"Динамо"нинг 2021 йилги энг яхши футболчиси легионерга айланди

Илгари сайтимиз орқали "Динамо"дан кетган Шоҳруҳ Абдураҳмоновни Беларуснинг "Энергетик-БГУ" клуби билан шартнома тузганлиги ҳақида хабар бергандик. Бу ўз тасдиғини топди.

Бу борада "Динамо" матбуот хизмати хабар берди. 2019 йил 19 ёшида "Динамо" жамоаси сафида Суперлигада дебют қилган Шоҳруҳбек Абдураҳмонов сўнгги уч йил давомида жамоамиз шарафини муносиб ҳимоя қилиб, самарқандлик мухлислар ёқимтойига айланди.

Хусусан, сўнгги 2021 йилда Шоҳруҳбек Абдураҳмонов ўзининг ажойиб ўйинлари ва голлари билан «Динамо»ни Суперлигага қайтишига улкан ҳисса қўшди. Якунда эса мухлислар томонидан «Динамо»нинг 2021 йилдаги энг яхши футболчиси, деб топилди. "Динамо" ПФК раҳбарияти Суперлига-2022 олдидан Абдураҳмонов билан шартномани узайтириш борасида ҳар қанча уринишмасин, Шоҳруҳбек ўзини Европада синаб кўришга қарор қилди ва Беларуснинг "Энергетик-БГУ" клуби билан шартнома имзолади, - дея ёзмоқда "Динамо" матбуот хизмати.