Диёр Имомхўжаев "Арал"нинг янги мавсумда Суперлигада иштирок этиши ҳақидаги гап-сўзларга қандай муносабатда бўлган эди?

Бундан бироз аввалроқ, “Арал” клуби 2021 йилги мавсумдан бошлаб, Суперлигада иштирок этиши ҳақида хабар берилган эди. Шу ўринда, Ўзбекистон профессионал футбол лигаси бош директори вазифасини бажарувчи Диёр Имомхўжевнинг 14 октябрь ва 3 ноябрда айнан “Арал” футбол клубининг Суперлигада иштирок этиши ҳақида билдирган муносабатларини ёдингизга солиб ўтмоқчимиз.

14 октябрь

- Президентимиз Қорақалпоғистонга ташрифи давомида "Арал" футбол клуби мавзусини кўтарди. Бу футбол оламидагилар учун ёқимли. Зеро "Арал самали" чиндан ҳам кучли клублар билан рақобат қила олмайдиган даражага келиб улгурган. Қорақалпоғистон нафақат катта футбол, балки аёллар футболи ҳамда футзал масаласида ҳам албатта ўсишга эришиши керак.

Шавкат Миромонович "Арал" клубининг яқин йиллар ичида ўзига келишига шаъма қилди. Айнан келаси йил Суперлигада ўйнайди, дейилмаганида маъно бор. Чунки 20 йил аввал Қорақалпоғистон бош жамоаси сунъий равишда элитага олиб чиқилган ва ура-ура билан икки йил Олий лигада ушлаб турилган. Табиийки, бош жамоанинг ўзига тегишли базасига, захира ҳамда кадр тайёрловчи мактабига эътибор қилинмаган. Шунингдек, клуб аниқ молиялаштириш манбаларига эга бўлмаган. Оқибатда жамоа икки йилнинг ичида қуйи лигага қайта тушиб кетган.

Демак, эндиликда ишни тўғри йўлга қўйиш талаб этилади. Биринчи галда моддий-техник базани қуриш, кадрлар салоҳиятини оширишга урғу бериш керак бўлади. Президентнинг бу таклифини қўллаб-қувватлаган ҳолда Арал клубининг Про лига мусобақасида истисно тариқасида иштирок этишига эришишимиз мумкин. Сир эмаски, мазкур лига учрашувлари УзРепорт ва Футбол-ТВ орқали намойиш этилмоқда. Бу кўплаб қорақалпоғистонлик дўстларимизга жонажон жамоалари учрашувидан баҳраманд бўлиш имкониятини тақдим этади.

ЎзПФЛ 2021 йилги мавсум учун 22 клубни лицензиялашдан ўтказди. 2022 йилги мавсумга қадар Про лига иштирокчилари сонини ва уларнинг сифатини ошириш вазифаси турган бир вақтда, "Арал самали" клубига бўлган бундай эътибор биз учун катта ёрдам бўлади. Умид қиламизки, 20 йил аввалги сунъийлик унут бўлади ва бу сафар ҳаммаси ФИФА низомларига, спорт принципларига тўғри келадиган ҳолатда рўй беради. Зеро Президент таъкидлаганидек, "Арал" чиндан ҳам қайта қуришга муҳтож. Про лига орқали биз клубни босқичма-босқич кўзланган мақсадга олиб келишимиз мумкин. Бу лигада Хоразм, Самарқанд, Фарғона каби вилоятларнинг ҳам бош жамоалари бор экани "Арал" учун ҳам мотивация бўлиб хизмат қилишига ишонамиз.

3 ноябрь

- "Арал" футбол клуби ҳақида гап-сўзлар кўпайгач, айрим ҳамкасбларимиз Суперлига клублари сонининг 16 тага етказилиши борасида бамайлихотир мулоқотлар, чиқишлар қилишни бошлашди.

Эртага бу жараён ҳақиқатга айланса, айнан шулар вазиятни танқид қилишга ўтишлари катта эҳтимол. Шундай экан, кеч бўлганида танқид қилгунча, аввалдан бу каби ишларнинг олдини олиш учун интилган тўғрироқ. Биз Президентнинг Қорақалпоғистонда футболни ривожлантириш борасидаги фикрларини тўла қўллаб-қувватлаймиз ва бу борадаги позициямизни мана шу нуқтада баён қилганмиз.

Биз спорт принципларига сунъий ташқи таъсирлар аралашувига йўл қўйиб берар эканмиз, порлоқ келажак ҳақида сўз қотишимиз мумкин эмас. Оддий мисол — "Сурхон" футбол клубининг Суперлигага қайтарилиши. Сизни ишонтириб айтаманки, бундан на биз ва на Сурхондарё футболи ютди. Чунки бу клуб бирор бир сурхондарёлик болакай катта футболгача эмин-эркин қадам қўйиб келиши учун амалда ҳеч бир иш қилгани йўқ.

Ўртоқлар, бизни ФИФА, ОФК каби халқаро ташкилотлар кузатиб боради. Бас шундай экан, бирор клубни икки лига сакратиб, элитага олиб чиқишимиз ҳеч қачон оқланадиган иш бўлмайди. Биз Президент айтган сўзларни тўғри талқин қилишимиз, жамоаларни биринчи навбатда, лицензиялаш талабларига тайёрлаб боришимиз энг тўғри йўл бўлади. Умид қиламизки, келаси мавсум Про лигамиз "Арал" жамоаси билан тўлдирилади ҳамда биз футболни ривожлантириш стратегияси доирасида мана шу клуб билан бирга ишлаш имкониятига эга бўламиз.