Диёр Имомхўжаев: "Қўқон-1912"нинг ФИФА билан муаммоси бир неча соатларда ҳал этилади

ЎзПФЛ директори вазифасини вақтинча бажарувчи Диёр Имомхўжаев ўз "Телеграм" саҳифасида "Қўқон-1912"нинг ФИФА билан юзага келган муаммоси ҳал этилиш арафасида эканлигини айтиб ўтди.

"Қўқон-1912" Боян Кнежович ҳамда Милош Николич билан муаммоларини ҳал қилди. Клуб раҳбарияти бунинг устида астойдил ишлади.

Аслини олганда, "Қўқон-1912" ўша вақтда ҳам қарзларини ёпган. Фақатгина тушунмовчилик сабаб муаммога аралашиб қолган. Бу энди бошқа мавзу. Клубга шу муаммони яратиб берганлар, албатта, ўз жазосини топиши керак. Ишонамизки, Қўқон-1912 охиригача боради.

Юқоридаги футболчилар билан ишлайдиган юрист ҳисоб-китобни тасдиқлади. ФИФА бир неча соат ичида ишни кун тартибидан олиб ташлайди", - деб ёзади Диёр Имомхўжаев.