Dunyoda Xolandni to‘xtata oladigan faqat 3 ta himoyachi bor

Germaniya terma jamoasi va Madridning “Real” klubi himoyachisi Antonio Ryudiger “Manchester Siti”ning norvegiyalik markaziy hujumchisi Erling Xolandni to‘xtata oladigan futbolchilar nomini aytdi.

“Erling – kuchli futbolchi, haqiqiy mashina. Uni to‘xtatish juda qiyin. Ayrim zamonaviy himoyachilar unga qarshi tura oladi. Fikrimcha hozirgi paytda Xolandni to‘xtata oladigan faqat uchta himoyachi bor: Saliba, van Deyk va men”, - dedi germaniyalik futbolchi Cope nashriga bergan intervyusida.

24 yoshli futbolchi joriy mavsum Angliya Premer-ligasida oltita o‘yin o‘tkazib, raqiblar darvozasini o‘n marta ishg‘ol qilishga erishdi. Erling ayni paytda dunyodagi eng qimmat futbolchi hisoblanadi. Uning bozor qiymati 200 million evroni tashkil qiladi.