Дунёнинг айни дамдаги энг кучли клуби ва мураббийи ким? Почеттино бу саволга жавоб берди

"Челси" бош мураббийи Маурисио Почеттино АПЛнинг навбатдаги туридан ўрин олган "Манчестер Сити"га қарши ўйиндан олдин ўз фикрлари билан ўртоқлашди.

“Менимча, “Манчестер Сити” – дунёдаги энг яхши мураббийга эга энг яхши жамоа. Ҳар бир чизиқда ўйинчилар ривожланса, бу уларнинг яхши ишлаётганлигининг тасдиғидир. Биз ўйин қийин бўлишини биламиз, лекин биз бу ўйинда уч очко олишни истаймиз”, - деди аргентиналик мутахассис.

Эслатиб ўтамиз, жорий мавсумда “Манчестер Сити” 11 ўйинда 27 очко жамғариб, АПЛ турнир жадвалида биринчи ўринни эгаллаб турибди. Бунгача Хосеп Гвардиола жамоаси кетма-кет уч марта мамлакат чемпионлигини қўлга киритганди. «Челси»га келсак, Маурисио Почеттино шогирдлари жорий чемпионатда 11 учрашувдан 15 очко жамғарган ҳолда 10-ўринда бормоқда.