Дзюдочиларимиз Континентал Лиганинг "Шарқ" дивизиони ғолиби бўлди

Россиянинг Тюмен шаҳрида дзюдо бўйича клублар ўртасидаги Континентал Лига мусобақасининг "Шарқ" дивизиони баҳслари ўтказилди. 

Мусобақанинг учинчи босқич доирасидаги ушбу дивизионнинг А гуруҳида Лиганинг ўтган йилги чемпиони "Урал-Западная Сибир", "Родина" (иккаласи – Екатеринбург), "Тюмен-дзюдо 2", В гуруҳида эса "Женйс" (Қозоғистон), "Тюмен-дзюдо" ва "Триумф" (Барнаул) клублари баҳсларга киришишди. 

Гуруҳнинг барча учрашувларида ғалаба қозонган "Женйс" 1/2 финалда "Урал-Запад Сибир" жамоасини 3:2 ҳисобида доғда қолдирди. Иккинчи 1/2 финалда "Тюмен-дзюдо" худди шу ҳисобда "Родина" жамоасидан устун келди. Ҳал қилувчи финал учрашувида "Женйс" "Тюмен-дзюдо"ни 3:1 ҳисобида таслим этди.  

Чемпион "Женйс"нинг ғалабаларига терма жамоамиз аъзолари Артём Штурбабин, Шаҳрам Аҳадов ва Париж-2024 Олимпиадаси совриндори Музаффарбек Тўрабоев ўз ҳиссасини қўшди. Континентал Лиганинг финал босқич турнири 1 ноябр куни Москва шаҳрида ўтказилади.

Бу ҳақда Ўзбекистон дзюдо федерацияси матбуот хизмати хабар бермоқда.