ЕЧЛ. "РБ Лейпциг" сенсацион тарзда ярим финалга чиқди

УЕФА Чемпионлар Лигаси чорак финал босқичидан ўрин олган навбатдаги учрашув якунланди. Лиссабон шаҳридаги “Жозе Алваладе” стадионида бўлиб ўтган баҳс германияликларнинг 2-1 ҳисобидаги ғалабаси билан якунланди.

Дастлаб, Дани Ольмо ҳисобни очган бўлса, захирадан ўйинга қўшилган Фелиш тарози палласини тенглаштирди. Аммо асосий вақт якунига 2 дақиқа қолганида Тайлер Адамс ғалаба голини йўллаб, жамоасига ярим финал чипталарини туҳфа этди.

Энди “буқалар” финал остонасида ПСЖ клуби қаршилигини синдиришга ҳаракат қилади.

• 90+8'
  

  Юқори темпда ўтган ўйин якунланди. Матнли трансляция Жавоҳир Азимов томонидан олиб борилди.

• 90+7'

  Фелишнинг қулай узатмасини Мората муваффақиятли якунлай билмади. Рақиб посбони Гулачи уни охирги умиддан ҳам махрум этди.

• 90+6'
  

  Асабларини жиловлай олмаган Хименес сариқ карточкага лойиқ кўрилди.

• 90+5'
  

  Анхелиньо майдонда ётибди. Бироз вақтдан сўнг унинг ўйинни давом эттира олиши ойдинлашди.

• 90+4'

  Жарима майдончаси ичида Мората бир рақибидан ўтиб, зарба беришга ҳозирланди. Аммо у кечиккан эди. Ҳимоячи тўпни тепиб юборди.

• 90+3'
  

  Коке ҳам майдондан олинди. Унинг ўрни Фелипе билан тўлдирилди.

• 90+2'
  

  Забитцер ўз ўрнини Мукиеле эгаллади.

• 90'
  

  Қизиқарли кечаётган баҳсга 5 дақиқа қўшилди.

• 88'
  

  ГООООООООООЛЛЛЛЛЛЛ!

  Анхелиньонинг қулай узатмасидан сўнг катта бўшлиққа эга бўлган Тайлер Адамс жамоасини олдинга олиб чиқди. Унинг зарбаси Савичга тегиб, дарвоза тўридан жой олди. Облак бу вазиятда мутлақо ожиз.

• 87'
  

  Ҳозиргина ўйинга қўшилган Хайдара ҳам огоҳлантирилди.

• 85'

  Иккала жамоа ҳам эҳтиёткорликка катта эътибор қаратмоқда.

• 83'
  

  Нагельсманндан иккиталик ўзгариш: Дани Ольмо ва Кристофер Нкунку ўрнига Патрик Шик ҳамда Амаду Хайдара жангга ташланди.

• 82'
  

  Қарши ҳужумга интилаётган рақибини тўхтатиб қолгани учун Кампль сариқ карточка олди.

• 81'
  

  Триппьернинг узатмасидан сўнг Льоренте ўйиндан ташқари ҳолатда қолиб кетди.

• 80'
  

  Бурчак зарбасини тезкорлик билан ўйинга киритган "матрасчилар"нинг навбатдаги ҳужуми Каррасконинг зарбаси билан якунланди.

• 79'

  "Атлетико"нинг захирадан ўйинга қўшилган футболчилари олдинги чизиқда фаоллик намойиш этяпти.

• 77'

  Ҳар иккала мураббий ҳам майдон четида шогирдларига кўрсатмалар беришда давом этяпти.

• 75'

  Жамоалар барча масалани қўшимча бўлимларгача ҳал этиш ниятида. Тўп марказда турмаяпти.

• 72'
  

  Нагельсманндан ҳам илк юриш: Конрад Лаймер майдонни тарк этди. Энди унинг орнида Тайлер Адамс ҳаракат қилади.

• 72'
  

  Ўйини очилмаган Коста ўз ўрнини Моратага бўшатиб берди.

• 71'
  

  ГООООООООООЛЛЛЛЛЛЛ!

  11 метрлик нуқтага айнан жабрланувчининг ўзи яқинлашди ва мўлжалда адашмади.

• 70'
  

  Клостерманн қўполлиги учун огоҳлантирилди.

• 70'
  

  Марказдан ажойиб рейд уюштирган Фелишни жарима майдончаси ҳудудида Клостерманн ортдан чалиб йиқитди.

• 69'

  Фелишнинг узатмасини Карраско эгаллаб, жарима майдончасига ёриб кирди. Упамеканодан ишончли ҳаракат.

• 67'

  Гол испанларга сув ва ҳаводек зарур. Бироқ немислар ҳам тўлиқ ҳимоявий ўйин кўрсатмаяпти.

• 65'

  Кераксиз вазиятда асабларини жиловлай олмаган Коста огоҳлантирилиши мумкин эди. Бироқ польшалик рефери уни аяди.

• 64'

  Айтиш жоизки, Фелишнинг майдонга туширилиши мадридликлар ўйинини кучайтирди.

• 62'
  

  Симуляция учун Ренан Лоди сариқ карточкага лойиқ кўрилди.

• 60'

  Ўйиннинг 1 соати ортда қолган бир вақтда Нагельсманн шогирдлари зарбалар, паслар сони ва аниқлиги бўйича рақибларидан олдинда бормоқда.

• 59'

  Триппьернинг жарима майдончаси ичига узатган пасини Упамекано қайтарди. Унинг ортида Коста қулай фурсат пойлаётган эди.

• 58'
  

  Илк ўзгаришни Диего Симеоне амалга оширди: Эктор Эррера Жоау Фелиш майдонга ташланди.

• 56'
  

  "Буқалар"нинг ҳужуми натижасида навбатдаги зарба юзага келди. Облакдан яна бир сейв.

• 55'

  Гол муаллифи Дани Ольмо марказда Сауль Ньигезни чалиб йиқитди.

• 53'

  Тўп ўтказиб юборганидан кейин дарҳол олдинга ўтган "Атлетико" футболчиларида қулай имконият пайдо бўлди. Упамеканодан ўтган Льоренте тўпни ўзидан узоқлаштириб юборди. Вазият қўлдан кетди.

• 51'
  

  ГООООООООООЛЛЛЛЛЛЛ!

  Ажойиб комбинация натижасида "РБ Лейпциг" вакиллари ҳисобни очди. Ўнг қанотдан Забитцернинг узатмасини Дани Ольмо дарвозага тўғирлаб юборди.

• 49'

  Жарима майдончасига кирмоқчи бўлган Нкункуни Сауль тўхтатди.

• 48'

  Иккинчи 45 дақиқаликни жамоалар марказдаги фаол курашлар билан бошлади.

• 46'
  

  Иккинчи тайм бошланди!

• 46'

  Футболчилар майдонга қайтишди. Биз ҳам қайтамиз!

• 45+4'
  

  Асабий руҳда кечган бўлим тугади!

• 45+3'

  Каррасконинг йиқитилиши оқибатида жарима зарбаси ишлаб олган Симеоне шогирдларининг тайм сўнггидаги ҳужуми самарасиз якунланди.

• 45+2'
  

  Бўлим охирини фаол ҳужумлар билан ўтказаётган "РБ Лейпциг" футболчилари бурчак зарбаси ишлаб олди. Стандарт вазиятдан оширилган узатмани Упамекано боши билан Облак постига йўллади. Словениялик кипер ўз ўрнида.

• 45'
  

  Марциняк биринчи таймга 4 дақиқа қўшиб берди.

• 45'

  Лаймернинг жарима майдончасига узатган тўпини олдинга чиққан Облак ушлаб олди.

• 43'

  Каррасконинг пасидан сўнг рақиб посбони билан бирга-бир вазиятга чиқиб кетмоқчи бўлган Диего Коста мақсадига ета олмади. Упамекано ўз ўрнида.

• 41'

  "Матрасчилар" жарима майдончаси ичида Нагельсманн шогирдлари комбинация ташкил этишга ҳаракат қилди. Вазият якунида тўп бой берилди.

• 39'

  Яна бир хавфли ўйин: жарима майдончасига ёриб кирмоқчи бўлган Льорентени Упамекано тўхтатди.

• 38'

  Ҳар икки футболчи ҳам ўйинни давом эттира олади. Савичнинг бошига махсус боғич ўралди.

• 36'

  Ҳар эҳтимолга қарши, захирадаги Фелипе фаол машғулотларга киришди.

• 34'
  

  Иккинчи қаватдаги тўп учун курашда Савич ҳамда Хальстенберг тўқнашиб кетди. "Атлетико" фулбекининг қоши ёрилди. Шифокорлар аллақачон майдонда.

• 33'
  

  Карраско яна бир бор қанотда рейд уюштирди. Бироқ Клостерман унинг йўлига тўғаноқ бўлди. Навбатдаги бурчак тўпи ҳам муваффақиятсиз якунланди.

• 31'

  Ўйин бироз қўпол курашлар остида кечмоқда: бир дақиқанинг ўзида ҳар иккала клуб ҳам сариқ карточкага тортадиган қўполлик ишлатишди. Арбитр яна жим.

• 28'

  Тезкор қарши ҳужумга югураётган Лодини бу сафар Лаймер қўполлик билан тўхтатди. Марциняк оғзаки огоҳлантириш билан чекланди.

• 26'

  Ўз қанотида рақибига нисбатан қўполлик ишлатган Лоди рақиб жамоанинг стандарт вазият ижро этишига сабабчи бўлиб қолди. "РБ Лейпциг" аъзолари қулай имкониятни кўкка совурди.

• 24'

  Жарима майдончасига орқа ўгириб турган Поульсен товони билан марказга пас берди. Хименес вазиятни назорат қилиб турган эди.

• 22'

  Хименеснинг тўпга чиқишдаги хатоси туфайли Нкунку яхши вазиятга эга бўлди. Ўзидан ҳам қулай позицияга чиқиб бораётган Анхелиньога тўпни узатган ҳужумчининг режасини Триппьер пайқаб қолди.

• 20'
  

  Чап қанотдан Лаймерни алдаб ўтган Каррасконинг марказга берган узатмасини ҳимоячилар майдон ташқарисига чиқариб юборди. Бурчак тўпи ҳам бесамар якунланди.

• 19'

  Стандарт вазиятдан тўпни жарима майдончасига Карраско етказиб берди. Бельгияликнинг узатмасини Хальстенберг қайтарди. Акс ҳолда, Сауль қулай имконият ҳосил қилиши мумкин эди.

• 17'

  Узоқ масофадан Камплнинг йўллаган зарбаси анча юқоридан ўтиб кетди.

• 15'

  Ўз жарима майдончаси ичида Лоди моҳирлик билан Анхелиньони зарарсизлантирди.

• 13'
  

  Бурчак зарбасидан "матрасчилар" ҳеч қандай наф чиқара олишмади.

• 13'
  

  Ренан Лоди ўз қанотидан ёриб кирди ва Карраскони тўп билан таъминлади. Янникнинг зарбасини Гулачи бартараф этди.

• 11'

  Диего Симеоне биз билган услубида: у ўйин бошидан бери ўз жойида ўтирмаяпти.

• 10'
  

  Яна бир бор Упамекано Костани йиқитди. Жарима тўпини ижро этган Кокенинг узатмасини Савич дарвозага йўллади. Гулачи ўз ўрнида.

• 9'

  "Атлетико"нинг илк марта олдинга юриши омадсиз пас натижасида узилиб қолди. Ўз навбатида, номинал мезбонлар ҳам қарши ҳужум уюштира олмади.

• 6'

  Ренан Лодига нисбатан Дани Ольмо ҳужумда қўполлик ишлатди.

• 4'
  

  Бурчакдан оширилган тўпни Хименес узоқлаштирди. Иккинчи темп билан ҳужумга ўтган "буқалар" аъзоси Хальстенбергнинг зарбаси ноаниқ кетди.

• 2'

  Марказда тўп учун ҳавода кураш бўлди. Упамекано Костага нисбатан ортиқча дадиллик билан муносабатда бўлди. Бугин шундай курашларга кўп гувоҳ бўламиз.

• 1'
  

  Учрашув бошланди!

• 0'

  Ўйин коронавирус қурбонлари хотирасига 1 дақиқалик сукут билан бошланади.

• 0'

  Жамоалар майдонга тушиб келишди. Чемпионлар Лигаси мадҳияси остида иккала клуб вакиллари бир қаторда саф тортишди.

• 0'

  Ассалому алайкум муҳтарам футбол ихлосмандлари. УЕФА Чемпионлар Лигаси чорак финалидан ўрин олган навбатдаги учрашув бошланиш арафасида.