Элдор Шомуродов ҳамда Аббосбек Файзуллаевнинг "Гёзтепе"га қарши ўйини неча баллга лойиқ кўрилди?

Туркия Суперлигасининг 25-турида "Истанбул Башакшеҳир" "Гёзтепе" билан куч синашиб, 2:1 ҳисобида зафар қучди. Ўйинни Элдор Шомуродов тўлиқ ўтказди, Аббосбек Файзуллаев эса иккинчи бўлим аввалида ўзгартирилди. 22 ёшли ҳужумчимиз жамоасининг биринчи голига ассистентлик қилди. 

Турли хил статистик порталлар бугунги учрашувдан сўнг икки вакилимизнинг ўйинини турлича баҳолади. 

"Fotmob" Аббосни 7.1 баллга, Элдорни эса 6.8 баллга лойиқ кўрган бўлса, "Sofascore" портали Файзуллаевга 6.8 балл, Шомуродовга 7.1 балл қўйди. 

Бундан ташқари, яна бир машҳур нашрлардан бири ҳисобланган "Flashscore" сайти 22 ёшли ҳужумчимизга 7.3 балл берди. Миллий терма жамоамиз сардорига эса 6.1 баллни лойиқ кўрди. 

Эслатиб ўтамиз, "Истанбул Башакшеҳир" навбатдаги беллашувини 14 март куни "Галатасарай"га қарши ўтказади.