Элдор Шомуродов: "Терма жамоага Темур Кападзе бош мураббий бўлганида хурсанд бўлдик"

Туркиянинг "Истанбул Башакшеҳир" ҳужумчиси Элдор Шомуродов Kun.uz YouTube каналига катта интервью берди. Футболчи суҳбат давомида Темур Кападзенинг Ўзбекистон миллий терма жамоасидаги мураббийлик фаолиятига ҳам тўхталиб ўтди.

"Темур Кападзе жамоага келганидан сўнг тезда ишга киришиб кетди. Ҳамма уни қўллаб-қувватлади."

Кападзени жамоа етакчилари хоҳламади, деган гаплар ҳам чиққан эди. Шу ҳақида нима дейсиз?

"Етакчилар Кападзени хоҳламади, деган гаплар нотўғри. Биз фақат янги мураббий олиб келишга қарши эдик. Кимдир Кападзенинг келишига қаршилик бўляпти, деб гап-сўз чиқариб юборди. Биз янги мураббий келса, кўп нарса ўзгариб кетишини билардик. Янги ғоя, янги тактика — ҳаммаси бошидан бошланарди. Бу эса охирига келганда салбий таъсир қилиши мумкин эди.

Шунинг учун Катанецга охиригача биз билан қолишини айтганмиз. Ундан кейин Жаҳон чемпионатигача вақт бўлади, ўшанда унинг ўрнига кимнидир олиб келиш мумкин эди. Кейинчалик эса Темур Кападзе келганидан хурсанд бўлдик. Сабаби, у терма жамоа ичида юрган, футболчиларни яхши билади ва тизимни бузмасдан ишни давом эттирди. Бу ҳолатдан биз ҳам мамнун бўлдик.

Биз фақат янги мураббий олиб келишга қарши бўлганмиз, чунки бу катта риск эди", — деди Шомуродов.