Elitagaga chiqmoqchi bo‘lgan klublar uchun zo‘r murabbiy yoxud Fuzaylov yana Superligasiz qolib ketmaydimi?

“Andijon”dan keyin “Buxoro” klubi ham Superliga chiptasini qo‘lga kiritdi. Faqat farqi shunda bo‘ldiki, andijonliklar oktyabr oyidayoq barchasini rasmiylashtirib qo‘ygan bo‘lsa, 2-o‘rin uchun kurash oxirgi turgacha davom etdi. Da’vogarlar “Buxoro” bilan “Turon” bo‘lib, yakunda buxoroliklar marraga ikkinchi bo‘lib etib keldilar.

“Buxoro” klubi oson bo‘lmagan yo‘lni bosib o‘tdi. Yodingizda bo‘lsa, jamoa chempionatni ikkita durang bilan boshlagan, keyinchalik ham jamoa qimmatli ochkolarni yo‘qotib, muxlislarida biroz xavotir hissini oshirgandi. Ayniqsa, “Buxoro” mavsumning birinchi yarmida, aniqrog‘i yozgacha bo‘lgan bellashuvlar mobaynida o‘yini “dimlanib” qolgandi, sira “ochilib” ketavermadi. Bu paytga kelib turli gap-so‘zlar ham yangradi. Jamoadagi ichki muhit u qadar yaxshi emasligi haqida eshitib turdik. Ammo rahbariyat va murabbiylar shtabi mavjud vaziyatdan munosib chiqib keta oldilar. Yozgi transfer paytida “Buxoro” tarkibi tozalandi. Bir qator futbolchilar ketdi va o‘rniga yangi ijrochilar qo‘shib olindi. Shundan so‘ng Hakim Fuzaylov boshqaruvidagi jamoa tubdan o‘zgardi va yuqori beshtalikka ajralganidan so‘ng eng xavfli raqibga aylandi.  

Hattoki, “Buxoro” klubi ancha vaqtgacha 3- va 4-o‘rinlarda yurdi. Qachonki, yuqori beshlikdagi kurash boshlanganidan keyin “Buxoro” ancha jonlandi va “Turon”ni ta’qib etib, 2-o‘ringacha chiqib, raqibining o‘rnini egalladi. Natijada buxoroliklar oxirigacha shu o‘rinni “Turon”ga bermasdan o‘zida saqlab qoldi. Fuzaylov shogirdlari chempionatdagi oxirgi 5 ta o‘yinning 4 tasida g‘alaba va 1 tasida durang o‘ynadi.

E’tiboringizni bir jihatga qaratmasak bo‘lmaydi. Bu bosh murabbiy Hakim Fuzaylov bilan bog‘liq. Tojikistonlik mutaxassis mavsum avvalida “Buxoro”ni boshqarishga kirishdi. Uning oldiga faqat va faqat jamoani Superligaga olib chiqish vazifasi qo‘yildi. O‘z navbatida Hakim Qayumovich ham rahbariyatga “Buxoro”ni kuchlilar orasiga qaytarishga va’da berdi. Ko‘rib turibsizki, 58 yoshli murabbiy gapining ustidan chiqdi. Darhaqiqat, uning jamoasi, ayniqsa, yozgi selektsiyadan keyingi jamoasi Superligaga chiqishga munosib o‘yin namoyish etdi.

Gap shundaki, Hakim Fuzaylov o‘tgan yili Samarqandning “Dinamo” klubiga bosh murabbiylik qilganida ham ushbu jamoani Superligaga olib chiqishga muvaffaq bo‘lgandi. Lekin chempionat tugagach, vazifa bajarib bo‘lingach, “Dinamo” rahbariyati nimagadir Fuzaylov bilan hamkorlikni to‘xtatishga qaror qilgan. Holbuki, Fuzaylov o‘zi tuzgan jamoa bilan elitada ham ishlashga munosib edi. Biroq rahbariyat Hakim Qayumovichni iste’foga chiqardi va oxiri nima bilan tugaganini yaxshi bilasiz. “Dinamo” yana pro ligaga tushib ketdi, Fuzaylov esa yana Superligaga chiqdi!

Albatta, Hakim Qayumovich “Dinamo”ning yana pro ligaga tushib ketgani uchun Samarqanddagi mehnatiga achindi. Lekin murabbiy to‘g‘ri yo‘ldaligini o‘z ishi bilan amalda ko‘rsatib, endi “Buxoro”ni elitaga qaytarishga muvaffaq bo‘ldi. Aytmoqchimizki, Fuzaylov yana O‘zbekistonga qaytgach, ikki mavsum ichida munosib natija ko‘rsata oldi. Axir ketma-ket ikki yil bir murabbiyning ikkita jamoani Superligaga olib chiqishini har kim ham eplolmaydi. Tojikistonlik mutaxassis 2021 yili “Dinamo” bilan, 2022 yilda esa “Buxoro” bilan bu qiyin vazifani bajardi. Pro liganing darajasi, nufuzi va undagi raqobatning oxirgi paytlarda keskin oshishini inobatga oladigan bo‘lsak, chindan ham Fuzaylovga tasanno aytsak arziydi.

Endi yana savol tug‘ilyapti: o‘z oldiga qo‘ygan vazifani muvaffaqiyatli bajargan Fuzaylov yana Superligasiz qolib ketmasmikin? Qolaversa, tojikistonlik mutaxassis klub bilan yil oxirigacha shartnoma imzolagan va amal qilish muddati tugayapti. Lekin bizdagi ma’lumotlarga qaraganda, “Buxoro” rahbariyati kelasi mavsum uchun ham Hakim Fuzaylov bilan hamkorlikni davom ettirmoqchi. Agar Superligaga chiqmoqchi bo‘lgan pro liganing biror-bir klubi Fuzaylovga taklif bilan chiqib qolsa, bundan ajablanmaymiz.

Shuhratbek Jo‘raev.