Энди "Арсенал"нинг нишонида "Барселона" футболчиси турибди

"Арсенал" Михаил Мудрикнинг трансфери муваффақиятсизликка учрагач, "Барселона"дан Рафиньяни сотиб олмоқчи.

"Evening Standard" нашри журналисти Низаар Кинселланинг хабар беришича, "Челси" Михаил Мудрикни тортиб олганидан сўнг, "Арсенал" спорт директори Эду Гаспар бразилиялик футболчининг агенти билан боғланиб, футболчининг қишда "Барселона"дан кетиши мумкинлигини муҳокама қилган.

Ўтган ёзда "Челси" ҳам, "Арсенал" ҳам ўша пайтда "Лидс"да ўйнаган Рафиньяни ўз сафига қўшиб олишга ҳаракат қилди. Аммо футболчи "Барселона"га ўтишни танлади. Қайд этилишича, каталонияликлар бразилиялик футболчини сотишга рози бўлиши мумкин.

Эслатиб ўтамиз, 26 ёшли футболчи "Барса" сафида барча мусобақаларда 22 ўйинда майдонга тушиб, 3 та гол урган ва 5 та голга ассистентлик қилган.