“Энди Остон Ўруновни олишга кучимиз етмайди!”
Қишки трансферлар вақтида “Спартак” Остон Ўруновни бошқа клубга трансфер қилиши ёки ижарага жўнатиши мумкинлиги ҳақида кўп гапирилмоқда. Ўзбек футболчисига харидорлар қаторида унинг авалги клуби “Уфа”нинг ҳам номи тилга олинмоқда. Ушбу клубнинг директорлар кенгаши раиси Ростислав Мурзагулов билан суҳбатлашган журналистлар яна бир бор Остон Ўруновни жамоага қайтариш масаласини кўтарди.
Эътиборингизга ушбу суҳбатнинг Ўруновга тегишли қисмини таржима қилган ҳолда ҳавола этамиз.
- Остон нега Москвада ўйнаб кета олмаяпти?
- Ўрунов у ерга эрта кетди. У катта чемпионатга эга бўлган мамлакатга эндигина келганди. “Уфа”да атиги бир нечта учрашувда тўп тепди холос.
Остон ўзининг имкониятларини билмайдиган, машғулотларда нималар қила олишини кўрмаган, уни умуман танимайдиган мураббий унга бирданига ишонч билдириб, кетма-кет имконият беришига ишониши соддаликдан бошқа нарса эмас. Мен “Спартак”да унга атиги 10 дақиқа беришларини билардим. Амалда шундай ҳам бўлиб чиқди.
Бундан ташқари, у ерда кўп нарса психологияга ҳам боғлиқ. Унинг “Спартак”да ўйнаб кетиши қийин бўлиши олдиндан маълум эди. У уриниб кўришга қарор қилди, футбол жамоатчилигига ўзини кўрсатди. Лекин Остоннинг келажаги борлигига ишонаман.
Агар Остоннинг ўрнида бўлганимда ярим йил, бир йил “Уфа”да ўйнаган бўлардим. Шунда у ўзининг бор истеъдодини намоён қилган бўларди. Барча мураббийлар унинг нималарга қодирлигини ўз кўзи билан кўрарди. Кейин каттароқ клубларга тантана билан йўл оларди. У эса, бироз шошилди.
- Унга қўнғироқ қилиб, “Остон ортга қайтиш вақти келди” демайсизми?
- Афсуски энди бунинг иложи йўқ. Агар шунга имконият бўлганида мен жуда хурсанд бўлардим. Лекин вазият анча мураккаб.
- Нега?
- Остон “Спартак”га ўтганидан кейин буюк футболчига айланди. Бунақа футболчиларни чўнтагимиз кўтармайди, энди уни олишга кучимиз етмайди. Биз бундан буёғига янги Ўруновларни қидиришга эътибор қаратамиз.
- Юраннинг Остон Ўруновнинг ёши урилгани ҳақидаги гаплари ҳақида нима дея оласиз?
- Сергей Юран эҳтиросга берилувчан одам. Бу гаплар унинг калласига қаердан келиб қолганини билмайман. Ўруновни узоқ вақт кузатганмиз. Уни бир ой ичида топганимиз йўқ. Остон паспортини қандай ўзгартирган бўлиши мумкинлигини тушунмайман. Мени кечирасизу, Ўзбекистон нуфузли давлат ва бу мамлакатда паспортни қалбакилаштириш жиноят ҳисобланади.
Остон Ўрунов айни пайтда "Спартак" билан Бирлашган Араб Амирликларида дастлабки ўқув-машғулот йиғинини ўтамоқда. Жамоа бош мураббийи Доменико Тедеско ўзбек футболчисининг ҳаракатларидан қониқаётганини таъкидлади. Шундай бўлса-да, Ўруновнинг Москва клубидаги келажаги ҳамон мавҳум бўлиб турибди.
Фикрлар