Энг бой теннисчи қиз финалда “онахон”ни енгиб, АҚШни забт этди
АҚШ очиқ чемпионатининг бош соврини япониялик Наоми Осакага насиб этди. Финал учрашувида беларуслик “онахон” Виктория Азаренкони 1:6, 6:3, 6:3 ҳисобида мағлубиятга учратди.
Азаренко фарзандли бўлганидан кейин “Катта дубулға” туркумидаги турнир финалига чиққан кам сонли теннисчилардан ҳисобланади. Тажрибали ракетка устаси ўтган йили кетма-кет мағлубиятлардан кейин катта спортни тарк этишни ўйлаб юрганди. Бироқ, қолишга қарор қилган Азаренко пандемия карантинидан кейин ажойиб ўйин намойиш этмоқда. Хусусан, Осакага қарши ўтказилган учрашувгача Виктория кетма-кет 11 та баҳсни ўз фойдасига ҳал қилди.
Наоми Осака эса 2018 йили АҚШ очиқ чемпионати ва кейинги мавсумда Австралия очиқ чемпионатидаги ғалабаларидан сўнг, йиллик даромадини 37,4 миллион долларга етказиб, энг бадавлат теннисчига айланган эди. Бу кўрсаткич теннисчи қиз учун рекорд натижа сифатида қайд этилган. Ҳозир осиёлик теннис юлдузига Procter & Gamble, All Nippon Airways ва Nissin Foods каби йирик компаниялар ҳомийлик қилмоқда.
Бу йил АҚШ очиқ чемпионатидаги ғалабаси эвазига Осака ўз ҳисоб рақамига яна 3 миллион доллар мукофот пулини ҳам қўшиб қўйди.
Комментарии