Энг зўр ҳимоячи ўзига ўхшаган шогирд тайёрлади

Англия футболида ҳимоя эталонига айланган Венсан Компанининг ўрнини боса оладиган футболчи топилмаётган эди. Бельгияда ўйин услуби Компаниникига жуда яқин бўлган янги юлдуз пайдо бўлди.

“Андерлехт” ҳимоячиси Марко Канани ўйин услуби туфайли “янги Компани” деб аташади. У яқин орада Англия чемпионатига кўчиб ўтиши кутилмоқда.

18 ёшли футболчига “Ливерпуль” харидор бўлмоқда. Марко Кана ёш бўлишига қарамай, икки мавсумдан бери Бельгия гранди шарафини ҳимоя қилмоқда. У шу кунга қадар йигирмата учрашувда майдонга тушиб, битта гол уришга ҳам эришди.

Кананинг ўзи ҳам мақсади кучли жамоаларда ўйнаш экани ва айни пайтда барча жабҳаларда илғор ҳисобланган “Ливерпуль”га ўтишга тайёр эканини билдирди.

Марко Кана айни пайтда “Андерлехт”ни бошқараётган Венсан Компанининг энг истеъдодли шогирдларидан ҳисобланади.