Эрон: АҚШ ФИФА қоидалари ва мезбон мамлакат мажбуриятларини бузмоқда. Бу спортга сиёсий тарафкашлик билан аралашишдир

Эрон элчихонаси АҚШ расмийларининг 2026 йилги жаҳон чемпионатига виза бериш бўйича ҳаракатларига муносабат билдирди.

Аввалроқ Эрон терма жамоаси делегациясининг бир қисми жаҳон чемпионатида иштирок этиш учун АҚШга виза ололмагани маълум бўлганди. АҚШнинг Туркиядаги элчиси Том Баракнинг айтишича, футболчилар ва "зарур хизмат кўрсатувчи ходимларга" Эрон гуруҳ босқичининг барча учта ўйинини ўтказиши керак бўлган Қўшма Штатларга киришлари учун рухсатномалар берилган.

Эроннинг Анқарадаги элчихонаси Баракнинг элчихона ходимларини Эрон жамоаси учун виза расмийлаштирилгани билан табриклаган постига муносабат билдирди.

“Ўзини мақташ орқали ФИФА қоидалари ва АҚШнинг мезбон томон сифатидаги мажбуриятларини бузадиган ҳаракатларни яшириб бўлмайди.

Бу спортга сиёсий тарафкашлик билан аралашишнинг энг ёмон шаклидир", - дейилади эронликларнинг постида.

2026 йилги жаҳон чемпионати 11 июндан 19 июлгача АҚШ, Канада ва Мексикада бўлиб ўтади.