Эрон мураббийи ЖЧ ҳақида: "Биз зулм кўраётган мамлакатмиз, майдондан ташқари муаммоларимиз кўп"

Эрон терма жамоаси бош мураббийи Амир Галенои АҚШга киришдаги чекловлар ва икки давлат ўртасидаги ҳарбий таранглик фонида жамоа дуч келаётган қийинчиликлар ҳақида гапирди.

"Бизда муаммолар жуда кўп, айниқса майдондан ташқарида. Мен жаҳон чемпионатида иштирок этаётган қолган 47 та терма жамоа мураббийларига мурожаат қилдим, аммо ҳеч бири жавоб қайтармади. Биз мусобақага жуда кеч етиб келдик, янги шароитга мослашиш учун камида икки ҳафта керак бўлди. Энг аламлиси, раҳбарларимиз ва оммавий ахборот воситалари вакилларига жамоани кузатиб келишга рухсат берилмади. Бу футбол руҳини синдиради. Бундай муносабат жаҳон чемпионати мақомига мутлақо тўғри келмайди. Сиз терма жамоани таклиф қиласиз, лекин унинг ходимларини қабул қилмайсизми?", – деди мураббий.

Амир Галеноига кўра, барча тўсиқларга қарамасдан, жамоа майдонга ўз мухлислари учун тушмоқда.

"Шунга қарамай, мен Эрон халқига миннатдорман, биз улар учун ўйнаяпмиз. Биламан, бизга бўлган бундай муносабат халқимизни ранжитди. Миллиардлаб доллар сарфласак ҳам, халқимиз учун адолатни тўлиқ тиклай олмасдик. Бу ҳолат яна бир бор шундан далолат берадики, биз зулм кўраётган мамлакатмиз. Умид қиламанки, тинчликка эришамиз ва у барқарор бўлади, сунъий тарзда яратилган, вақтинчалик ҳолат эмас", – дея таъкидлади Галенои.

Эрон терма жамоаси бош мураббийи Бельгияга қарши баҳс олдидан тайёргарлик жараёнидаги қийинчиликларга ҳам тўхталиб ўтди.

"Бельгия билан ўйин арафасида камида 24 соатлик танаффус керак эди, бизга эса 16 соат берилди, шу боис машғулотни ярим йўлда тўхтатишга мажбур бўлдик. Бу адолатдан эмас, шароитлар тобора қийинлашиб бормоқда", – деди у.