Эрон терма жамоаси "ЖЧ-2026" ўйинларини тўхтатиш билан таҳдид қилди

Эрон терма жамоаси "Жаҳон чемпионати–2026" учрашувларини давом эттиришдан бош тортиши мумкин. Бундай қарор стадионда терма жамоага қарши йўналтирилган ноқонуний байроқлар ёки шиорлар пайдо бўлса, қабул қилиниши айтилмоқда, деб хабар берди Reuters агентлиги. 

Бу ҳақда Эрон спорт вазири Аҳмад Донямалий маълум қилди. Унинг сўзларига кўра, ушбу масала юзасидан расмий огоҳлантириш аллақачон ФИФАга юборилган.

— Биз ФИФАга шундан иборат талабни етказдик: агар жаҳон чемпионатида Эрон терма жамоаси иштирокидаги ўйинларда норасмий байроқлар кўтарилса ёки миллий жамоага қарши шиорлар янграса, терма жамоа вакили майдондаги ўйинни тўхтатишга мажбур бўлади, — деди Донямалий.

Вазирнинг таъкидлашича, ФИФА Эрон томонини Мисрга қарши ўйин вақтида бундай ҳолатлар юз бермаслигига ишонтирган.

Бундан аввал Эрон ва Миср футбол федерациялари ФИФАга мурожаат қилиб, Сиэтл шаҳридаги ўзаро ўйин пайтида Pride тадбирлари билан боғлиқ акцияларга йўл қўймасликни сўрашган эди. Ушбу беллашув маҳаллий ташкилотчилар томонидан шаҳарда ўтказилаётган Pride Week доирасига киритилган.

Шунингдек, апрель ойида Ванкувер шаҳридаги ФИФА конгресси яқинида Эронни жаҳон чемпионатида иштирок этишдан четлатишни талаб қилган намойишлар ҳам ўтказилган.

Эрон терма жамоаси "Жаҳон чемпионати–2026" мусобақасида "G" гуруҳида иштирок этади. Жамоа 15 июнь куни Лос-Анжелесда Янги Зеландияга қарши ўйин билан мусобақани бошлайди. 21 июнда Бельгияга қарши майдонга тушади, 26 июнда эса Сиэтл шаҳрида Миср терма жамоаси билан баҳс олиб боради.