Эрон устидан қозонилган ғалаба Ўзбекистонга мундиал эшикларини очиши мумкин
Замонавий футболда нафақат жисмоний, балки руҳий ҳолатнинг ҳам тутган ўрни улкан. Айниқса, катта ўйинлар чоғида бу омил биринчи планга чиқиб кетиб қолиши ҳеч кимга сир эмас. 16 ноябрь санасида Ашхободда бўлиб ўтган Туркманистонга қарши баҳсда йигитлар характер эвазига мураккаб аҳволдан чиқиб кетганини кўрдик.
Ҳисобда ортда қолаётган ўйинларда руҳан синиб қолмай, вазиятни ғалаба билан якунлаган ўйинларимиз сони (Катанец даврида) 3 тага етди. Бу терма жамоамиз бошқарувидаги мураббийлар орасидаги энг яхши натижалардан бири. Словениялик мутахассис айнан руҳий ҳолат ва тартибли ҳимоя эвазига стабил ўйин намойиш этишга қодир терма жамоа шакллантиришга уринмоқда. Бу ресурс билан эҳтиёткор футбол ўйнаш энг оптимал қарор эканлиги кундек равшан.
Сречко Катанец терма жамоа ролида 2 йилдан ортиқ иш олиб бормоқда. Бир нечта йиғин ва ўнлаб ўртоқлик ўйинларидан сўнг мутахассис терма жамоанинг асосини тўлиқ шакллантириб бўлди. Таркибдан ташқари, ўйин схемаси ва стратегиясини ижрочиларга тўлиқ етказиб берилиши учун етарлича вақт тақдим қилинди. 
Руҳий ҳолатимиз яхшиланаётгани фонида Эрон билан тўқнашув нафақат 3 очко, балки сўнгги йилларда бой берилган ўз кучига ишончни ҳам қайтариб бериши лозим. Тошкентда ўтадиган баҳсдаги ғалаба терма аъзоларининг бутун цикл давомида руҳан ўзини анча дадил ҳис қилиш имконини беради. Терма жамоамиз бирорта ЖЧ саралаш босқичини стабил ўтказмаган. Баъзан перформанслар кўрсатган бўлсак, ортидан аутсайдерларга имкониятни бой берганмиз. Айнан ўша баланснинг йўқлиги сабабли ҳар сафар етдим деганда, йиқилиб келдик. 2026-йилда бўлиб ўтадиган мундиал иштирокчиси бўлишни истасак, заиф нуқталаримизни кучли томонимизга айлантиришимиз шарт.
Тўғри, ўзаро ўйинлардаги кетма-кет мағлубиятлардан сўнг Эрон кўплаб ишқибозлар кўз ўнгида биз учун ўтиб бўлмас тўсиққа айланиб қолгандек таассурот қолдирмоқда. Статистикага эътибор қаратсак, аслида ҳам шундай эканлигини кўриш мумкин. Худди Япония, Жанубий Корея, Австралия сингари форслар ҳам қитъа гранди образида ишқибозларимизни бир неча марта ранжитган. Энг ачинарлиси, Эрон биз билан баҳсда ўртача ўйин кўрсатиб ҳам ортга ғалаба билан қайтиб кетишни уддалаб келмоқда. Сабаби оддий. Бизга етишмаган руҳий ҳолат ва стабиллик уларнинг асосий қуроли саналади.
Шунга қарамай, футбол бир жойда турмайди. У ривожланмоқда. Юқорида бежизга Эрон билан баҳсда ғалаба қозонишимиз шарт эканлиги ҳақида таъкидламадим. Форслар билан тўқнашувдан "омон" чиқсак, бу руҳий импулс бизга кейинги босқичларда ҳам грандларга қарши майдонда ўзимизни дадилроқ тутишимиз учун замин яратади. 800 кундан ортиқ вақт давомида Катанец айнан мана шундай катта ўйинлар учун жамоани тайёрлади. Руҳан анча чидамли бўлиб бораётганимизни барча сезмоқда. Бу фактор якунда ЖЧ йўлланмасини қўлга киритишимиз учун асосий омил вазифасини бажариб бериши мумкин.
Форсларга қарши гуруҳ пешқадамлиги, ФИФА рейтинги учун бериладиган баллар билан биргаликда, йигитларнинг грандлар қаторида эканлигини ҳис қилиши учун ҳам ғалаба қозонишимиз шарт. Умид қиламанки, футболининг бир неча 10 йиллик орзусини амалга ошириш учун катта йўл ёқасида турган "оқ бўрилар"ни ишқибозлар 21 ноябрь куни Ўзбекистонда ёлғизлатиб қўймайди!
Яҳёхўжа Улуғхўжаев
Фикрлар