Эррол Спенс ёки Теренс Кроуфорд, титанлар баҳсида ким ғолиб бўлади?

29 июль куни АҚШнинг Невада штати, Лас-Вегас шаҳрида жойлашган “T-Mobile” аренасида ярим ўрта вазн тоифасида (66,6 кг) узоқ кутилган WBC, WBA, IBF чемпиони Эррол Спенс (28-0, 22КО) ва WBO камари эгаси Теренс Кроуфорд (39-0, 30КО) ўртасидаги жанг бўлиб ўтади. Ушбу тўқнашув олдидан ташкил этилган бир неча матбуот анжуманларида ҳар икки боксчи ҳам бу жангни анча вақтдан буён кутишини ҳамда бунда ғалаба ким томонда бўлса, ўша энг кучли боксчи эканлигига ҳеч қандай шубҳа қолдирмаслигини билдириб ўтди.

Теренс Кроуфорд - ўз профессионал фаолиятини енгил вазн тоифасида (61,2 кг) бошлаб, WBO жаҳон чемпионлик камарини қўлга киритган. Орадан бир неча йил ўтиб, супер енгил вазн тоифасига (63.5 кг) кўтарилган. Айтишимиз жоизки, айнан шу вазнда Кроуфорд дунёга танилиб машҳур бўлган. У дивизиондаги барча WBC, WBO, IBF, WBA Super, The Ring Magazine камарларини осонликча қўлга киритиб яна бир поғона юқорилади. Уни ярим ўрта вазнда (66,6 кг) ҳам чемпионлик жанги узоқ куттирмади. Мэнни Пакьяони ўз уйида мағлуб этган Жефф Ҳорнга қарши жанг қилиб осонликча уни мағлуб этди ва WBO чемпионлик камарини қўлга киритди.

Кўпчилик “хейтер”лар Кроуфордни ярим ўрта вазнда номдор боксчилар билан жанг қилмаганликда айблашади. Бироқ, унинг “шорт-лист”ига қарайдиган бўлсак ҳақиқатда унинг ушбу вазндаги энг номдор рақиби бу - Шон Портердир. Бошқа номдор боксчилар Амир Хон, Кел Брур билан уларнинг юлдузли онлари сўнган пайтда тўқнаш келган эди.

Эррол Спенс – 2017 йилда Англияга ташриф буюриб, ўша вақтдаги IBF чемпиони ҳисобланган Кел Брукка қарши жанг ўтказиб, муддатидан олдин ғалаба қозонди. Ундан кейин кетма-кет ярим ўрта вазн топ жангчилари - Шон Портер, Данни Гарсия, Ёрденис Угас каби боксчиларни мағлуб этди. Юқоридаги уч жангда фақатгина Портер билан бўлган натижа ҳақиқатда бироз эътирозга сабаб бўлган. Ўшанда кўпчилик Портерни устунлигини кўришган.

Эксперт ва мухлисларнинг Эррол Спенс ярим ўрта вазнда кўпроқ муносиб рақиблар билан жанг қилганини таъкидлашади. Бироқ бу фикрлар нисбийдир. Сабаби 66.6 кг ҳамда 69.9 кгдаги элитадаги боксчиларнинг кўпчилиги Спенснинг промоутери Эл Ҳеймон мижози ҳисобланишади. Бунда эса табиийки кучли жангларни ташкил этиш осонлаштиради.

Спенс-Кроуфорд жангидан олдинги матбуот анжуманида Еррол Спенснинг мураббийи Деррик Жеймс бу баҳс бошқа жангларда бўлгани каби Эррол босим қилиб ҳаракат қилишини таъкидлади

Кроуфорднинг мураббийи Браян Мажинтайр у жангга 100 фоиз тайёрлигини, Эррол жанг куни ўзининг энг яхши ҳолатини кўрсатишига умид билдирди.

29 июль кунга ушбу жанг натижаси ярим ўрта вазнда 4 та йўналиш камарлари, The Ring Magazine камари ҳамда катта эҳтимол билан P4P рейтингида кимнинг ўрни юқорироқ эканига ойдинлик киритади. Ўтказиб юборманг!

Жасурбек Саидмусаев