Эсановнинг "Акрон"даги фаолияти қандай бошланди? Нега 25-рақамни танлади? "Андижон"дан қандай хотиралар қолди? Россиядаги дебютант легионеримиз билан суҳбат

Яқинда Россия премьер-лигасига кўчиб ўтган ҳамюртимиз Шерзод Эсановнинг “Акрон” клубидаги фаолияти бошланди.

Илк бор легионерга айланган ярим ҳимоячи у ерда ҳам ўз иқтидорини намойиш қилишига умид қиламиз. Айни пайтда ҳамюртимиз янги чемпионат ва янги клубга мослашиб бормоқда. Эсанов ҳозирча Россия Кубогида майдонга тушди. "Акрон"нинг "Рубин"га қарши беллашувида легионеримиз асосий таркибга киритилди ва 57 дақиқа давомида тўп сурди. Аммо "Акрон" "Рубин"га 0:4 ҳисобида ютқазди.

Куни кеча “Акрон” бош мураббийи Заур Тедеев ўз интервьюсида Эсановнинг потенциалини юқори баҳолашини ва ундан умиди катталигини алоҳида айтиб ўтди. Эсанов эса Sports.uz сайтига интервью берди.

- Шерзод “Акрон” клубидаги фаолиятингиз бошланди. Бу сиз учун янги саҳифа. Хўш, сизни қандай кутиб олишди?

-  Ассалому алайкум. Жамоага қўшилганимга кўп бўлмаса ҳам жамоам мени анча яхши кутиб олди. Бунинг учун уларга раҳмат айтаман.

- Янги жамоага мослашишда кимлар кўпроқ ёрдам бермоқда?

- Жамоамиз аҳил. Ҳамма десам ҳам бўлади. Мураббийлар, ходимлар, футболчилар, спорт директор, хуллас барча билан яхши алоқадамиз.

- “Акрон” таклифи дастлаб қачон пайдо бўлганди ва бу танловни амалга ошириш қандай юз берди?

- Мен билан агентим алоқага чиқди ва бу таклифни ҳар томонлама ўйлаб рози бўлдим.

- “Акрон”да 25-рақамни танладингиз. Нима учун ёки бўшлиги учунми?

- Билмадим, шу рақамни олгим келди. Бўшлиги учун деса ҳам бўлади.

- Акрон” яқинда РПЛдаги дебют ғалабасини қўлга киритди. Ўйин қандай таассурот қолдирди?

- Жуда ажойиб ўйин бўлди. Тезроқ чемпионатда ҳам ўйнашни хоҳлаяпман.

- “Андижон”даги фаолиятингизни қандай хотиралар билан эслайсиз?

- Биласизми, “Андижон”дан жуда катта таржиба орттирганман, ҳам ҳаётий, ҳам спорт томонлама. Шу фурсатдан фойдаланиб жамоадошларим, муррайбийларга, Андижон халқи мухлисларга раҳмат айтаман.

-  Ўз олдингизга қўйган мақсадингиз нима?

- Мақсадларим кўп ва ўз олдимга қўйган мақсадларим сари ҳаракат қиламан.

Шуҳратбек Жўраев.