Фаолиятида пасайиш кузатилган футболчимиз қўшни чемпионатда

20 нафар ҳамюртимиз Тожикистон чемпионатида тўп сурмоқда. Албатта, уларнинг ораларида ўзларини кўрсата олаётган ва мухлисларнинг эътиборини тортаётган футболчиларимиз ҳам топилади.

Айтайлик, энг кўп ўйинчимиз тўп сураётган “Хўжанд” жамоасининг ҳам жорий йилдаги мақсадлари катта. Шу мақсадда улар ўз таркибига тўрт нафар ўзбекистонлик ўйинчини жалб этишганидан хабарангиз бўлса керак. Уларнинг орасида эса ярим ҳимоячи Санжар Рихсибоев ҳам бор.

Бунга қадар “Хўжанд” клубида тўп сураётган ҳамюртларимиздан Маъмур Икромов ва Андрей Сидоровнинг у ердаги таассуротлари ҳақида маълумотлар бердик. Шунингдек, клуб бош мураббийи Никола Лазаревич ҳам илк бор сайтимиз орқали ўзининг фикр ва мулоҳазаларини билдириб ўтганди. У эса жамоасида ўзбекистонлик футболчиларга катта ишонч билдираётганига ҳам алоҳида тўхталганди.

Охирги пайтларда эса ушбу мураббийнинг қўли остида ўйнаётган ҳамюртларимиздан бири Санжар Рихсибоев Тожикистонда кўпчиликнинг эътиборини тортмоқда. Боиси, у ўз ўйинлари ҳамда голлари билан нафақат жамоадошлари, балки мухлисларнинг ишончини қозонмоқда.

Хўш, аслида Рихсибоевнинг тожик клубида пайдо бўлиши қандай юз берди? Бунга ким сабабчи? Санжар ушбу масалада гапирар экан, “Хўжанд”га ўтишида туртки бўлган инсонга миннатдорчилик билдирди.  

- “Хўжанд” жамоасига келишимга катта сабабчи бўлган “Бунёдкор” клуби директори Улуғбек ака Мирзаевга катта миннатдорчилик билдириб ўтмоқчиман. Агар бу инсон бўлмаганида нафақат “Хўжанд”да бўлмасдим, балки футболни тугатган ҳам бўлишим мумкин эди. Янги жамоада эса мени жуда яхши кутиб олишди. Янги жамоадошларим билан ҳам тезда тил топишиб кетдим. Биринчи марта легионер бўлиб ўйнаяпман. Ҳозирча бу ердаги ишларим яхши ва умид қиламанки, бундан кейин ҳам барчаси бардавом бўлади.

рихсибоев

Иқтидорли ярим ҳимоячи бунга қадар ўзимизнинг чемпионатда ҳам бир қатор клубларда тўп сурганди. Бироқ тан олиш лозимки, унинг Тожикистондаги фаолияти бир мунча омадли бошланди. У ерда учта гол муаллифи бўлди. Лекин Ўзбекистон чемпионатида Рихсибоевни бунчалик кўзга ташланганини пайқаш қийин эди.

- Тўғрисини айтадиган бўлсам, бир ярим йил давомида барқарор равишда ўйнай олмадим, - дея мавзуни давом эттирди, Санжар. - Балки шунинг учун ҳам эътибордан четда қолиб кетдим шекилли. Элитадаги дебютимни эса мен Жиззахда бошлагандим. Ундан кейин “Обод” жамоасида фаолиятимни давом эттирганман. У ердан эса мени АГМКга таклиф қилишган. “Бунёдкор”га келишимдан олдин олти ой, бир йилча давомида футбол ўйнаганим йўқ. Балки шу боис ҳам мухлислар мени унутиб қўйишгандир. Тожикистонда эса фаолиятим яхши бошланди, голлар уряпман. Аслида ҳам футболчини футболчи қилиб турадиган бу мухлислардир. Агар футбол ўйнаб ўзингизни кўрсатаверсангиз, уларнинг эътиборида бўлаверасиз.

рихсибоев2

Кўриб турганингиздек, охирги пайтларда Рихсибоевнинг у қадар кўзга ташланмай қўйганига маълум бир сабаблар бўлган. Қизиқ, бу нима билан боғлиқ? Жароҳатларми ёки бошқа муаммоларми? Қолаверса, анча муддат футболдан ташқарида юрган ўйинчи руҳий тушкунликка тушиши ҳам ҳеч гап эмас.  

- Тўғри, ҳаёт доим ҳам бир хил тарзда кетавермайди, у текис ва нотекисликлардан иборат. Ҳаммада ҳам ўзига яраша муаммолар бўлади. Ҳар қандай ўйинчида ҳам яхши кунлар ва қийинчилик пайтлари бўлиб туради. Агарда ҳаёт бир текисда бўлганида яшашнинг ҳам унчалик қизиғи бўлмасди ҳам. Гапнинг очиғи, менда оилавий муаммолар бўлган. Шунинг учун ҳам бироз спорт формамдан чиқиб қолганман. Натижада кўп мураббийларнинг ишончидан қолганман. Худога шукрки, ҳозир ҳаммаси яхши. Мана, аста-секин спорт формамга қайтяпман, - дея жавоб қайтарди, Рихсибоев.

рихсибоев3

Умуман олганда, Санжар Тожикистонда фаолиятини бошлаганидан сўнг юқорида таъкидлаганимиздек, кўпчиликнинг ишончини қозонмоқда. Бунинг устига ўзбекистонлик мухлисларнинг ҳам эътиборини тортяпти. Қисқа қилиб айтганда, ҳамюртимиз қўшни чемпионатда нималарга қодирлигини исботлашга ҳаракат қиляпти. Фаолиятини Тожикистонда бошлаганидан кейин футболчимиздаги ишонч қай тариқа уйғонди? Бунга ўзидан жавобни эшитамиз.  

- Бу ерга легионер бўлиб келганман. Нафақат бу ерда, балки бошқа жойларда ҳам легионер футболчи маҳаллий ўйинчилардан бир, икка баробар устун бўлиши керак. Чунки эртага сизнинг орқангиздан яхши гап қолиши лозим. Масалан, Ўзбекистон чемпионатига ҳам олиб келинадиган легионер албатта ўзимизнинг футболчилардан кучли бўлиши талаб этилади. Агар маҳаллий ўйинчилар билан тенг бўлса, у ҳолда ўзимизнинг футболчилардан фойдаланган яхши. Бу ерда ҳам шунақа. Янги чемпионатга келгач, ўзингиздаги масъулиятни янада чуқурроқ ҳис қила бошлайсиз. Чунки сиз легионерсиз ва маҳаллий ўйинчилардан яхшироқ ўйнашингиз керак бўлади. Эртага ортингиздан ёмон гап қолишини хоҳламайсиз. Тушкунликдан чиқишимга ота-онам ҳам сабабчи бўлишди. Ҳаракат қилгин, орқага қайта олмайсан, барибир олдинга қараб ҳаракат қилишинг керак, ортга йўл йўқ дейишди. Худога шукрки, юзим ёруғ бўляпти. Агар ўзимга ишонмаганимда бу ерга легионер бўлиб келмасдим. Қўрқув ёки бошқа нарса йўқ. Тўғриси, рақобатдан умуман қўрқмайман. Шунчаки, мураббийнинг ишончи бўлса бўлди.

Шунингдек, Санжар Рихисбоев “Хўжанд” клубининг мақсади ва бош мураббийи ҳақида ҳам тўхталар экан, ҳаммаси тўғри йўлда эканлигини ҳамда мураббийнинг ҳам ишончи катта эканлигига урғу берди.

- Жамоамиз тўғри йўлдан кетяпти. Биз олдимизга жиддий вазифаларни қўйганмиз. Бундан кейин ҳам натижаларимиз янада яхши бўлади деб ўйлайман. Жамоанинг бош мураббийи ёш, ўз ишига нисбатан жуда талабчан. Жамоадаги барча легионерларга ҳам катта ишонч билдирмоқда. Тожикистон футболи ҳам ривожланиш даврида. Шу боис бу ерга ҳам кўплаб ўзбекистонлик ўйинчилар келиб ўйнашяпти. Барибир бу ерда ўзбекистонлик футболчиларга эътибор кучли бўляпти.

рихсибоев5

Хабарингиз бўлса, куни кеча Тожикистонга ҳам коронавирус кириб келганлиги сабабли чемпионат ўйинлари тўхтатилди. У ердаги вазият ҳақида эса ҳамюртимиз шундай деди: 

- Ўзингиз ҳам кўриб турганингиздек, ҳамма мамлакатда коронавирус бор. Бу ерда ҳам имкони қадар унинг олдини олишга ҳаракат қилишяпти. Ҳозирча маълум муддатга карантин эълон қилинган. Бу қанча давом этишини вақт кўрсатади.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)