Фарғонада футбол аралаш каратэ! Ёки мағлубиятни хазм қилишни қачон ўрганамиз?

Футбол эҳтиросларга бой ўйин-а, унда кимдир ютади ёки ютқазади. Бугун про-лигада “йил ўйини” дея таъриф берилган “Нефтчи” ва “Турон” клублари ўртасидаги учрашув бўлиб ўтди. Аммо жамоаларнинг ҳолати бир-биридан фарқ қиларди. Масалан, “Нефтчи”нинг Суперлигага йўл олишига дуранг ҳам етарди, “Турон”га эса фақат ғалаба зарур эди. Охир-оқибат ўта шиддатли ўтган учрашувда “Турон” ютди ва илк бор Суперлига йўлланмасига эга чиқди.

Бу йилги про-лига тан олайлик, олдингиларига нисбатан юқори савияда ўтди. Бунинг асосий сабабларидан бири шу бўлдики, ПФЛнинг саъй-ҳаракатлари билан про-лига учрашувлари “FutbolTV” телеканали орқали тўғридан-тўғри эфирга узатилди. Ҳаммаси ажойиб ўтди, кўнгилдагидек кечди, фақат унинг якуни шу қадар аянчли бўлдики, оқибатда йил давомида қилинган барча меҳнатларга лой чапланди.

“FutbolTV” орқали ушбу ўйинни кўпчилик жонли эфирда кузатди. Бош ҳакам Шавкат Насибуллаевнинг ўйин тугаганлиги ҳақидаги ҳуштагидан кейин мағлубиятга чидай олмаган “Нефтчи” футболчилари ҳакамларга ёппасига ташланиб кетди. Дарвозабон Шерзод Абдураимов қанот ҳакамини турткилай бошлади, қолганлар эса Насибуллаевни. Очиғи, майдонда юз берган воқеалар шунчаки даҳшатнинг ўзгинаси бўлди. Айниқса, мухлисларнинг майдонга тушиб ҳакамларни тепкилаб ташлашлари жуда хунук иш бўлди. Бу каби ўта салбий ҳатти-ҳаракатлар “Нефтчи”нинг обрўсига янада путур етказиши турган гап. Майдонда юз берган воқеалар эса дарҳол интернет оламида ва ижтимоий тармоқларга яшин тезлигида тарқалди. Одамлар бир-бирига савол беришяпти, “футбол кўрдингизми, йўқ, футбол аралаш каратэ кўрдим”, деган жавобларни эшитяпмиз. Бу нима дегани?! “Нефтчи” футболчисининг каратэ услубида Шавкат Насибуллаевга зарба берганини мутлақо оқлаб бўлмайди.

Шу ўринда, ҳакамлар ҳақида икки оғиз тўхталиб ўтмоқчимиз. Бу ўйинни Насибуллаев бошчилигидаги ҳакамлар бригадаси ёмон бошқармаганди. Мухлисларни жунбушга келтирган вазият эса охирги дақиқадаги ҳолат билан боғлиқ. Мезбонлар аъзоси Мансур Саидовнинг зарбасидан кейин тўп “Турон” футболчининг қўлига тегиб майдон ташқарисига чиқиб кетганди. Ҳакам ўша вазиятга яқин турганди ва ҳолатни пенальтига тортмаслиги сабабли ўйинни давом эттирди.

Агар ҳакам ўша вазиятда хато қилган бўлса, буни кўриб чиқадиган махсус қўмита бор. Ахир, мана ЎФА томонидан ҳакамлар билан жиддий ишлаш орқали барчани тартибга келтиряпти-ку. Лекин ўйиндан кейин ҳакамларни аёвсиз калтакланиши ҳеч бир қолипга сиғмайди. Бу ўзбек футболи учун шармандалик-ку! Бизга шундай футбол керакмиди? Бизга майдонда ур-тўполонлар керакмиди? Умид қиламизки, ЎФА раҳбарияти юз берган воқеаларни жиддий назоратга олади ва айбдорларга нисбатан тегишли жазоларни қўллайди.    

Аслида-ку, ҳамма айб “Нефтчи”нинг ўзида эканини наҳот унинг мухлислари англашмаса?! Агар ўтган турда “Динамо”ни мағлубиятга учратганида ҳозир улар севимли жамоасини Суперлигага йўлланмани қўлга киритгани билан табриклаётган бўлардилар. Аммо ўша куни “Нефтчи” “Динамо”га ютқазди ва бу орқали “Турон”га ўз қўллари билан Суперлигага чиқиш йўлида имкониятни тақдим этиб берди. Натижада охирги турга келиб бу икки жамоа ўртасидаги ўйиннинг аҳамияти ортиб кетди. Мана, оқибатда нималар бўлди? Ўйиндан кейин жанжал кўтарган “Нефтчи” энди қоида бўйича Суперлиганинг 13-ўрин эгаси билан плей-оффда беллашиши керак. Лекин бугунги жанжалдан сўнг, раҳбариятнинг қарори қандай бўлишини кутамиз. Яна қайтарамиз, бу каби жанжаллар орқали ўзбек футболини шарманда қилишга ҳеч кимнинг ҳаққи йўқ!

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Фикрлар

Фикр қолдириш учун авторизациядан ўтинг!
Azim Xudayberdiev
02/12/2020 13:57
Энг аввало футболчиларни Хакамга босим килиши узи жазога лойик Футболчиларни Хакамга босим килиши ПФЛ томонидан уйин давомида булса жазо системасини киритиш керак Факт битта бу уйин эмас
Алишер Собиров
01/12/2020 20:28
Албата яхши иш булмади бундай ишни биз мухлислар хам коралаймиз...лекин судя жанобларида хам айиб йук эмас..уйин давомида жамоа 90 дакика химаяланиш мункун факат бита имканятан фойдаланиб галаба козониш мункун...нефтчида шу имконият булган эди..МАНСУР САИДОВ тепган туп химоячи кулига тегди(химоячи кулини тупни йулига куйди)бу вазията хакам курмаслика олди.биринчи булимда дарвозабонга ишлатилган куполика кизил шарт эди хакам шундай булишига уз айибдар