Фарҳод Бекмуратов Малайзияга кетадими ёки...

Юртимизда қишки трансфер ойнаси очилгач, барча клублар таркибида қандай ўзгаришлар юз бераётгани мухлисларни қизиқтираётгани табиий. Жумладан, “Андижон” сафида ҳам эътиборга молик ўзгаришлар кузатилмоқда. “Бургутлар” таркибини тарк этаётган футболчилар ҳам бор.

Биздаги маълумотларга қараганда, 30 ёшли тажрибали ярим ҳимоячи Фарҳод Бекмуратов келаси мавсумни катта эҳтимол билан бошқа клубда бошлайди. “Андижон” билан шу ойда шартномаси якунига етадиган футболчининг хизматига қизиқиш билдираётган клублар талайгина.

Шунингдек, унга Малайзия чемпионатидан ҳам аниқ таклифлар мавжуд. Уни қўлга киритиш учун курашаётган жамоалар орасида Тошкентнинг “Локомотив” клуби етакчилик қилмоқда.

Таъкидлаш керакки, Фарҳод сўнгги икки мавсумни “Андижон”да ўтказди. Ўтган вақт давомида “Бургутлар” сафида 50 та ўйинда майдонга тушди. Эътиборлиси, у илгари “Андижон” билан про лига ғолибига айланган. Кейин “Локомотив”да мамлакат чемпионлигини қўлга киритди. Бу йил эса Ўзбекистон Кубогидан аввал берган интервьюсида Кубокни қўлга киритишга ваъда берганди ва у ўз ваъдасининг устидан чиқди.

Тез орада Бекмуратов олдида турган танловлардан бирини танлайди.