Farhod Bekmurodov: "Anchadan beri meni "Metallurg"da ko‘rishmoqchi edi"

Bekobodning “Metallurg” klubi joriy mavsum oldidan tarkibini bir qator o‘yinchilar hisobiga kuchaytirdi.

Jumladan, o‘tgan yili “Qo‘qon-1912” jamoasida to‘p surgan yarim himoyachi Farhod Bekmurodov ham bekobodliklar safiga o‘tdi. Bu xususida futbolchi Sports.uz saytiga shunday dedi:

- “Metallurg” klubiga qo‘shilishimga sabab shuki, bu jamoadagilar meni uzoq vaqtdan beri o‘z saflarida ko‘rmoqchi edilar. Ammo ayrim sabablarga ko‘ra, ushbu klubga o‘tishim amalga oshmay kelayotgandi. Mana, bu yil rizqimiz shu erda ekan, endi “Metallurg” sharafini himoya qilaman. Maqsad har bir o‘yinda g‘alaba qozonib muxlislarni xursand qilish”.