Fayzullaevning chempion bo‘lish imkoni qancha?

Rossiya Premer-ligasining uchdan biri yakunlanib bo‘ldi. Jamoalar o‘ntadan uchrashuv o‘tkazdi.

“Krasnodar” hali mag‘lubiyatga uchramagan yagona jamoa  sifatida 24 ochko bilan birinchi o‘rinda qayd etilgan. “Lokomotiv” hisobida ham 24 ochko bor. Amaldagi chempioni “Zenit” asosiy raqobatchilaridan bir ochko kam jamg‘argan holda uchinchi o‘rinda bormoqda.

Opta statistik platformasining superkompyuteri dastlabki o‘nta tur o‘yinlari tahlili asosida jamoalarning chempion bo‘lish imkoniyatlarini hisoblab chiqdi.

Unga ko‘ra, olti yildan beri chempionlikni hech kimga bermay kelayotgan “Zenit”ning yana oltin medallarni qo‘lga kiritish imkoniyati eng yuqori baholadi. Sun’iy idrok piterliklarning chempionligini 45,4 foizga baholamoqda.

Umumiy ko‘rsatkichlar esa qo‘yidagicha bo‘ldi:

“Zenit” — 45,4%;

“Krasnodar” — 30,4%;

“Lokomotiv” — 20,8%;

“Dinamo” — 2,1%;

TsSKA — 0,8%;

“Spartak” — 0,5%.

Opta markazi superkompyuterining hisob-kitoblariga ko‘ra,  boshqa biror jamoada chempion bo‘lish ehtimoli yo‘q.

Eslatib o‘tamiz, chempionlikka da’vogar jamoalar orasida Abbosbek Fayzullaev o‘ynayotgan TsSKA ham bor. Biroq “armiyachilar”ning imkoniyati bir foizga ham etmagan.