Фердинанд МЮ раҳбариятига 2 та зўр футболчини сотиб олишни тавсия қилмоқда

“Манчестер Юнайтед”нинг афсонавий ҳимоячиси Рио Фердинанд жамоа раҳбариятига Жон Макгинн (“Астон Вилла”) ва Деклан Райсга (“Вест Хэм”) эътибор қаратишни тавсия қилди.

"Характер ҳозирги "Манчестер Юнайтед"га керак бўлган элементлардан биридир. Менимча, Жон Макгинн яхши футболчи ва одамларга ҳақиқатни айтишдан қўрқмайдиган ажойиб профессионал. Муваффақиятга эришиш учун нафақат футболчилик қобилияти, балки шахсий фазилатлар ҳам муҳимдир. Жон бу жиҳатдан ҳам жуда яхши. Райсга келсак, у ҳақида аллақачон етарлича айтилган. Менга бу футболчи жуда ёқади. Сиз унинг атрофида жамоа қуришингиз мумкин", - деди Фердинанд Standard нашрига берган интервьюсида.

Трансфермаркт портали талқинига кўра, 27 ёшли Жон Макгиннинг нархи 30 миллион еврога, 23 ёшли Деклан Райсники эса 75 миллион еврога баҳолаган.