Фернандеш МЮга шарт қўйди

"Манчестер Юнайтед" ярим ҳимоячиси ва сардори Бруну Фернандеш манкунианликларга жорий мавсум охиригача "сўнгги имконият" берди. 31 ёшли хавбек "деярли ҳеч нарса" учун клуб билан доимий курашдан чарчаган. Шу билан бирга, португалиялик "қизил иблислар" билан соврин ютишни орзу қилмоқда. Бу ҳақда The Touchline хабар бермоқда.

Аввалроқ ОАВ Фернандеш қишда Мадриднинг "Реал" клубига ўз хизматларини таклиф қилгани, бироқ рад жавобини олгани ҳақида ёзганди.

Ярим ҳимоячи "қизил иблислар" сафида 2020 йил қишидан буён тўп суриб келмоқда. Жорий мавсумда португалиялик футболчи барча мусобақаларда 22 та ўйинда майдонга тушиб, бешта гол ва 11 та голли узатмани амалга оширди. Футболчининг клуб билан амалдаги меҳнат шартномаси 2027 йилнинг ёзига қадар мўлжалланган. Transfermarkt порталида келтирилган маълумотларга кўра, футболчининг бозор нархи 40 млн еврони ташкил этади.