ФИФА ЖЧ-2026 йўлланмасига яқин турган жамоалар орасидаги Ўзбекистоннинг имкониятини баҳолади

Кабо-Вердедан Суринам ва Ўзбекистонгача, қайси мамлакатлар илк бор ФИФА Жаҳон чемпионатига чиқиш имкониятини қўлга киритиш арафасида турганини билиб олинг.

Бразилия барча 22 та чемпионатда иштирок этган. Германия 20 та, Аргентина эса 19 тасида қатнашган.

Шундай бўлса-да, ФИФАга аъзо 211 та ассоциациянинг 62 фоиздан ортиғи ҳали бир марта ҳам бу гўзал ўйиннинг энг нуфузли мусобақасида иштирок этмаган.

Бу кўрсаткич рекорд даражадаги 48 та жамоа иштирок этадиган ва кўплаб янги дебютантларга имконият тақдим этадиган ФИФА "Жаҳон чемпионати-2026"да пасайиши шубҳасиз.

2022 йилги 32 жамоали финалда фақат мезбон Қатар илк бор иштирок этган бўлса-да, 2026 йилги чемпионатга йўлланмани қўлга киритган дастлабки етти давлатнинг барчаси аввалги жаҳон чемпионатлари тажрибасига эга.

Қуйида мундиал йўлланмасига яқин турган миллий терма жамоалар билан танишишингиз мумкин:

Иордания, Ўзбекистон, Кабо-Верде, Кюрасао, Гватемала, Никарагуа, Суринам, Венесуэла ва Янги Каледония.

ФИФА саралашнинг учинчи босқичининг навбатдаги тури олдидан Ўзбекистон миллий терма жамоасининг имкониятларини баҳолади.

ФИФА рейтинги: 57
Аҳолиси: 36 миллион

Барча потенциал дебютантлар орасида "Оқ бўрилар" Жаҳон чемпионатига чиқиш имкониятини энг мустаҳкам ушлаб тургандай кўринади. Март ойида Теҳронда ўйин тугашига етти дақиқа қолганида Меҳди Тареми 2:2 ҳисобдаги дурангга сабаб бўлувчи голни урди. Бу Эрон терма жамоасининг кейинги босқичга чиқишини таъминлади ва Ўзбекистоннинг умидларини вақтинча бўлса-да, барбод қилди.

Шундай бўлса-да, Тимур Кападзе жамоаси кучли позицияда қолмоқда. Улар "А" гуруҳида 8 та ўйинда 5 та ғалаба ва 2 та дуранг ҳисобига Бирлашган Араб Амирликларидан 4 очко олдинда турибди. Энди уларга тарихий йўлланмани қўлга киритиш учун Абу-Дабига бўладиган сафар баҳсида атиги бир очко олиш кифоя.