ФИФА "Машъал"дан трансфер тақиқини олиб ташлади

Бир муддат аввал “Машъал” футбол клубининг нигериялик бўлган собиқ футболчиси Ибе Микаел Окоро клубни у билан тўлиқ ҳисоб-китоб қилмагани борасида ФИФАги шикоят қилгани ҳақида маълумот бергандик.

Мазкур шикоятни ўрганиб чиққан ФИФА футболчилар мақоми ва ўтиши қўмитаси жорий йилнинг апрель ойида “Машъал” ва Ибе Микаел Окоро ўртасидаги баҳсли вазият юзасидан қарор чиқариб, “Машъал” футбол клуби зиммасига юклатилган жарима тўловларини 45 кун муддат ичида тўлаш шартини қўйган эди.

Куни кеча футболчининг вакиллари ФИФАга клуб бу борада тўлиқ тўловни амалга оширмади, дея мурожаат қилишди. Шу сабабли ФИФА 30 майдан эътиборан “Машъал” футбол клуби учун трансфер тақиқи белгилаган эди.

“Машъал” ҳозирга келиб Ибе Микаел Окорога барча тўловларни амалга ошириб ФИФАга барча маълумотларни тақдим этди ва якунда ФИФА “Машъал” жамоаси тақдим этган маълумотларни ўрганиб чиқиб, трансфер тақиқини бекор қилди.

“Машъал” матбуот хизмати.