Финалдаги мағлубиятга қарамай, МЮ Сульшерга янги шартнома таклиф қилмоқчи

"Манчестер Юнайтед" раҳбарияти жамоа бош мураббийи Уле Гуннар Сульшер билан ҳамкорликни давом эттирмоқчи.

The Telegraph нашри тарқатган хабарга қараганда, яқин орада клуб вице-президенти Эд Вудворд норвегиялик мутахассисга 3 йиллик махсус таклиф билан мурожаат қилади. Бундан ташқари, раҳбарият Сульшерга ёзда камида 4 та янги футболчи сотиб олишга ваъда бермоқда.

"Манчестер Юнайтед" бу мавсум Англия премьер-лигаси ҳамда Европа лигасида 2-ўринни эгаллади. Шу тариқа, “қизил иблислар” келаси мавсум учун ЕЧЛ йўлланмасини қўлга киритди.

48 ёшли Сульшер “Манчестер Юнайтед”ни 2018 йилдан буён бошқариб келмоқда. У бунгача "Мёльде" ҳамда "Кардифф Сити" каби жамоаларга устозлик қилган.