Флик “Барса” учун асосий трансфер нишонини танлади

Англия Премьер-лигасида “Кристал Пэлас” клуби шарафини ҳимоя қилиб келаётган марказий ҳимоячиси Марк Гехи Европанинг бир неча гранд клубларининг эътиборини ўзига қаратган.

Хусусан, 25 ёшли футболчи Испаниянинг амалдаги чемпиони “Барселона” трансферлар рўйхатига ҳам киритилган. Бу ҳақда Cadena SER хабар бермоқда.

Манбага кўра, каталонияликлар Гехи атрофидаги  вазиятини диққат билан кузатмоқда, бироқ футболчини қўлга киритишда ҳали ҳам “Ливерпуль” фаворит ҳисобланади.

Шу билан бирга, “Барселона” бош мураббийи Ханс-Дитер Флик Марк Гехини 2026 йил учун устувор трансфер нишони, деб ҳисоблаши таъкидлаган. Германиялик мутахассис клуб спорт директори Декудан Гехини олиб беришни сўраяпти.

“Кристал Пэлас” сардори бу мавсум барча турнирларда 18 та учрашувда майдонга тушиб, ҳимоядаги вазифаларини бажаришдан ташқари битта гол урди ва учта голли узатмани амалга оширди. Футболчининг “бургутлар” билан амалдаги шартномаси шу йилнинг ёзига қадар мўлжалланган.