Флик “Барса”га қандай футболчи керак эканлигини айтди

"Барселона" бош мураббийи Ханс-Дитер Флик жамоада яққол етакчи йўқлиги муаммоси ҳақида гапирди.

"Тўғри, бизга майдонда етакчилик қобилиятига эга футболчилар керак. Масъулият асосий аҳамиятга эга. Жамоа 100% куч сарфлаганида, ўйин сифати жуда юқори бўлади. Бизда аниқ етакчи йўқ, лекин ҳамма ўсиши ва бир-бирини қўллаб-қувватлаши керак. Мен бу жамоага тўлиқ ишонаман ва бўлажак ўйинларни интиқлик билан кутаман. Биз иккита мағлубиятни ортда қолдирдик, гарчи яхшиланишимиз кераклигини билсак ҳам", - дея Фликнинг сўзларини келтиради AS.

12 февраль куни "Барселона" Испания Кубоги ярим финалида Мадриднинг "Атлетико" клубига ютқазди (0:4). 16 февраль куни "кўк-анорранглилар" Ла Лига баҳсида "Жирона"га (1:2) имкониятни бой беришди.