Флик "Барселона"да яна бир мавсум қолиши мумкин

"COPE" нашрининг хабарига кўра, "Барселона" раҳбарияти жамоа бош мураббийи Ханс-Дитер Флик билан шартномани 2028 йил июнигача узайтириш имкониятини ўрганмоқда.

Аввалига немис мутахассиси 2026/27 йилги мавсумдан сўнг мураббийлик фаолиятини якунлашни режалаштирган эди. Бироқ ҳозир у бу қарорни ўзгартириши мумкин, чунки бундай танлов қилиш учун ҳали эрта, деб ҳисобламоқда.

Флик клуб ва лойиҳадан жуда мамнун. Айниқса, уни "Ла Масия" академиясида олиб борилаётган ишлар катта таассурот қолдирган. Шунингдек, мураббийнинг оиласига Барселона шаҳрида яшаш ҳам ёқмоқда. У спорт директори Деку ва клуб президенти Жоан Лапорта билан яхши муносабатда.

Немис мутахассиси ўз келажаги кўп жиҳатдан Лапортанинг клубда қолишига боғлиқ эканини таъкидламоқда. "Барселона" президенти сайловлари 2026 йилда бўлиб ўтади.