Флик "Реал"га қарши беллашувдан аввал жамоа ва футболчиларнинг ҳолати билан биргаликда бўлажак ўйин ҳақида гапирди

11 май куни "Барселона" Ла Лиганинг 35-турида "Реал Мадрид"ни қабул қилади. Ушбу беллашув олдидан каталонияликлар бош мураббийи Ханс-Дитер Флик бўлажак ўйин ҳақида ўз фикрлари билан ўртоқлашди.

– Миландаги мағлубиятдан кейин ("Интер"га қарши) ҳолатимиз яхши. Ҳамма билади, бу осон эмас, аммо биз ҳаммаси тўғри кетиши учун ҳаракат қиляпмиз ва нимани хоҳлашимизни гапиряпмиз. Олдимизда тўртта ўйин бор ва клаcико жуда муҳим. Асосийси – ўз ўйинимизни кўрсатишга ишонч бўлиши керак.

Менимча, Левандовски ва Бальдега бошиданоқ ишона олмайман. Жерар Мартин ва бошқа ўйинчилар жуда яхши ўйнаяпти. Бу ўйиндан кейин яна учта ўйинимиз бор – эҳтимол, улар иккинчи бўлимда майдонга тушар.

Чемпионлар Лигасидан чиқиб кетганимиздан кейин ўйинчилар қандай ҳис қилгани ҳақида гаплашдик. Бундай вазиятларда очиқ гапириш муҳим. Класикодек ўйинда 100 фоизлик куч билан ўйнаш керак. Биз фаол ўйнашни, ўйинни назорат қилишни истаймиз. "Реал" – фантастик жамоа, аммо биз уйда ўйнаймиз ва мухлисларимиз орқамизда бўлади – бу жуда муҳим.

Агар ўйинчилардан сўрасангиз, улар ҳар доим клаcикони ютишни хоҳлашади. Турнир жадвали аҳамиятга эга эмас. Биз фақат шу ўйинга диққат қилганмиз ва барча кучни сарфлаймиз, – дея таъриф бериб ўтди германиялик мутахассис.