Флорентино Перес “Реал”га айнан шу мураббий келишини орзу қиляпти

Мадриднинг “Реал” клуби президенти Флорентино Перес тажрибали мутахассис Юрген Клоппни жамоа бош мураббийи сифатида кўришни орзу қиляпти. Бу ҳақда Footmercato нашри журналисти Санти Ауна хабар берди.

Манба маълумотига кўра, мадридликлар раҳбари германиялик мураббийни “Қироллик клуби”га келишга кўндириш учун ҳаракат қилиб кўради.

Юрген Клопп мураббий сифатида дастлаб, Германиядаги “Майнц” клубида ишлаган. Бироқ у Дортмунднинг “Боруссия” жамоасини бошқарган даврида шуҳрат қозонган.

2016–2024 йиллар оралиғида эса, Клопп “Ливерпуль”ни муваффақиятли бошқарган. Англия клуби билан Англия Премьер-лигасида ғалаба қозонган, УЕФА Чемпионлар лигаси, миллий кубоклар ҳамда клублар ўртасидаги жаҳон чемпионатида зафар қучган.

Айни пайтда Юрген Клопп бош мураббийлик ишидан чекинган ва футбол соҳасида бошқарув йўналишида фаолият юритмоқда.