Формула-1. Расселл Австрияда ғалаба қозонди, “Ред Булл” оғир мавсумдаги энг яхши натижасини қайд этди

“Мерседес” пилоти Жорж Расселл Австрия Гран-присида 1-ўринни қўлга киритди. Макс Верстаппен ва Кими Антонелли кучли учликдан жой олишди.

Пойга стартида биринчи бурилишга етакчи тўртлик ўша тартибда кирди: Расселл, Леклер, Хэмилтон, Антонелли. Бироқ айлана давомида Хэмилтон Леклерни ортда қолдирди, шундан сўнг монаколик ҳайдовчи Антонелли билан кураш олиб борди. Бундан фойдаланган Верстаппен иккаласини ҳам қувиб ўтди.

Натижада учинчи айлана бошига келиб Расселл ва Хэмилтон таъқибчилардан уч сонияга узоқлашди, етакчилар орасидаги фарқ эса бир ярим сонияга етди. Аммо кейинчалик Верстаппен британиялик ҳайдовчига яқинлаша бошлади ва еттинчи айланада ҳужум қилишга уринишларни бошлади.

11-айланада Верстаппен Хэмилтонни ортда қолдирди, бироқ Льюис нидерландиялик ҳайдовчига қарши ҳужум қилиб, иккинчи ўрнини қайтариб олди. Икки чемпион ўртасидаги кураш Расселлга фарқни беш сониягача ошириш имконини берди.

Бироз вақт ўтиб, 13-айлана бошида Хэмилтон биринчи бўлиб пит-стопга кирди ва “Medium” шиналарини “Hard”га алмаштирди. У трассага 11-ўринда қайтди. Унинг ортидан Леклер ҳам пит-стоп қилди ва у ҳам қаттиқ шиналарни олди.

18-айланада “Ред Булл” жамоаси икки машина билан биргаликда пит-стоп амалга оширди. Шу вақтга келиб Хэмилтон бешинчи ўринга етиб келган, Верстаппен эса икки сония ортда қолган ҳолда олтинчи ўринга қайтганди. Кейинги бўлиб Расселл пит-стопга кирди ва фақат Антонелли ҳамда ҳали пит-стоп қилмаган Норрисни олдинга ўтказди. Норрис эса икки айланадан сўнг пит-стопга кирди.

22-айланада Верстаппен яна Хэмилтонни қувиб ўтди. Британиялик ҳайдовчи қарши ҳужум қилди, аммо яна позициясини бой берди ва дарҳол бир сония ортда қолди.

24-айланада Сайнс трассада тўхтаб қолди ва сариқ байроқлар режими эълон қилинди. Антонеллини пит-стопга чақиришди, аммо “Virtual Safety Car” (виртуал хавфсизлик машинаси) режими ёқилган вақтга келиб италиялик ҳайдовчи аллақачон трассага қайтган эди ва бундан фойдалана олмади. Натижада “Мерседес” пилоти бешинчи ўринда қайтди. Хэмилтон эса “Virtual Safety Car” пайтида иккинчи пит-стопини амалга ошириб, юмшоқ “Soft” шиналарга ўтди.

Трассада яшил байроқлар қайтиши билан Антонелли Леклерга ҳужум қила бошлади ва тез орада уни ортда қолдирди. Шу пайтда Хэмилтон Хаджардан ўтиб, Пиастрини қувишга киришди.

37-айланада Леклер Пиастрига қарши курашда позициясини бой берди ва олд қанотининг чекка қисмини шикастлади. Орадан кўп ўтмай Хэмилтон ҳам уни қувиб ўтди, шундан сўнг монаколик ҳайдовчи дарҳол пит-стопга кирди. “Феррари” эса қанотни алмаштирмасликка қарор қилди.

Бу вақтда Верстаппен Расселлга яқинлашишда давом этди ва 42-айланага келиб улар орасидаги фарқ бир сониягача қисқарди.

43-айланада Пиастри ва Хэмилтон пит-стопга киришди ва трассага Леклер ортидан худди шу тартибда қайтишди. Кейин Расселл ҳам пит-стоп қилди ва Верстаппен ҳамда Антонеллини олдинга ўтказди. Беш даврадан сўнг Пиастри Леклерни, бироз кейин эса Хэмилтон ҳам уни ортда қолдирди.

49-айланада Антонелли Верстаппенга ҳужум масофасигача яқинлашди, аммо нидерландиялик ҳайдовчи пит-стопга кирди ва трассага учинчи ўринда қайтди. Расселл Антонеллидан саккиз сония олдинда эди, бироқ у ҳам пит-лейнга кирди ва учинчи ўринга тушиб қолди.

Пойганинг сўнгги айланасида Антонелли Верстаппенга ҳужум масофасигача яқинлашди, Макс эса Расселлдан икки сония ортда эди. Аммо якунда кучли учликдаги ҳолат ўзгармади: Расселл пойгада ғалаба қозонди, Верстаппен иккинчи, Антонелли эса учинчи ўринни эгаллади.