Франциялик футболчилар Абдуқодир Ҳусановга қандай баҳо беряпти?
Абдуқодир Ҳусанов ўйнаётган “Ланс” Европа Лигасининг плей-оффида жавоб учрашувини Германияда “Фрайбург” жамоасига қарши ўтказади.
Дастлабки учрашувда кучлар тенг келиб, ўйинда ҳисоб очилмаган эди. Бу гал Бундеслиганинг ўртамиёна жамоаси “Ланс” қаршилигини ўз мухлислари кўз ўнгида енгиб етишига ҳаракат қилади.
“Ланс” бош мураббийи Франк Хейз олдида масъулиятли вазифа турибди. Унинг бошчилигидаги мураббийлар штаби асосий ҳимоячи Кевин Дансо ўрнига муносиб номзодни бошланғич таркибда майдонга тушириши керак.
Кўпчилик Абдуқодир Ҳусанов дисквалификация қилинган австриялик ҳимоячининг ўрнини эгаллашга қодир, деб ҳисобланмоқда.
Мухлислар ўртасида ташкил этилган сўровномада ҳам ўзбек легионери бошланғич таркибга киритилиши энг кўп овоз олган вариант бўлди.
Айни пайтда ҳамюртимиз юқори спорт формасида. Қатар мезбонлик қилган Осиё кубогида Абдуқодир Ҳусанов ишончли ўйин кўрсатди. Бунинг самарасида футболчимизнинг трансфер нархи яна кўтарилиб 2 миллион еврога етди.
Терма жамоадан қайтганидан кейин Ҳусанов “Фрайбург” жамоасига қарши ўтказилган биринчи ўйинда атиги бир неча дақиқа ўйнади холос.
Бироқ Франция чемпионати доирасида “Реймс”га қарши баҳсни бошланғич таркибда боўлади. Абдуқодир бу баҳсда Жонатан Градит ўрнига тўп тепди. Айтиш жоизки, Ҳусанов жуда фаол ўйнади ва асосий таркиб ўйинчиси эканини исботлаб қўйди.
Шу пайтга қадар Абдуқодир Ҳусанов миллий чемпионатда олти маротаба бошланғич таркибда майдонга тушган. Гарчи уларнинг ҳаммасида барқарор ўйин кўрсатган бўлса-да, ёшлиги туфайли кўп баҳсларда захирада қолиб кетяпти.
“Фрайбург” билан бўладиган ўйин олдидан франциялик тажрибали ҳимоячи Массадио Хайдара ўзбек футболчиси ҳақида фикр билдириб, унинг жамоага ёрдами катта бўлишини таъкидлади.
- Абдуқодир Ҳусанов яхши ўйинчи, учрашувларга жуда катта таъсир ўтказа олади. Аслида у ёш ўйинчи, лекин майдонда кўрсатаётган ўйин даражасига қараб, биз унинг ёшини инобатга олмай қўйганмиз.
Катта футболда муваффақиятга эришиши учун унда барча имконият бор. Абдуқодир жиддий йигит, шунга қарамай, маслаҳатларга қулоқ тутади, беллашувларда бор кучини сарфлашга ҳаракат қилади.
Биз ҳар томонлама уни қўллаб-қувватлашга ҳаракат қиляпмиз. Унга кўпинча маслаҳат берамиз, бошида тил масаласида бу анча қийин бўлганди, лекин футболнинг умумий тили бор, ҳозирча кўпроқ шу тилда мулоқот қиляпмиз.
Ҳусанов буларни биз кутганимиздан ҳам тезроқ ўзлаштиряпти, - деди Массадио Ҳайдара.
Абдуқодир Ҳусанов учун жорий мавсум муваффақиятли ўтмоқда. 19 ёшли футболчимиз Европанинг кучли бешлик чемпионатларига кирувчи Франция юқори дивизионида ўйнаётган биринчи ўзбек футболчиси сифатида тарихдан жой олди. Шунингдек, бир мавсумнинг ўзида Европанинг икки нуфузли мусобақаси – Чемпионлар лигаси ва Европа лигасида дебютини ўтказишга муваффақ бўлди.
Шунингдек, Ўзбекистон миллий терма жамоасининг асосий таркибидан муқим жой олди.
Фикрлар