"Гаплашишни истамаган жойга ўзимиз югуриб бормаймиз" - Баҳром Ҳайдаров "Сурхон"даги вазият бўйича муносабат билдирди

Термизнинг “Сурхон” жамоасида юз бераётган ўзгаришлардан хабардорсиз. Клубга янги мутахассислар келди. Ўтган йили “Сурхон” бош мурарббийи сифатида ишлаган Баҳром Ҳайдаров ҳам энди клуб билан бирга эмас.

Лекин деган жойи бор. Гап шундаки, ҳали Ҳайдаровни расман ишдан бўшатишганми? Мана шу савол ҳам йўқ эмас. Чунки бу борада клуб расмий маълумот бергани йўқ.

Аммо шуниси аниқки, фарғоналик мураббий “Сурхон”да эмас. Бу масала юзасидан Баҳром Ҳайдаров Sports.uz мухбирига қуйидагиларни айтди.

“Янги раҳбарият мен билан алоқага чиққани йўқ”

- Ўтган йилги шартномага мувофиқ, яна қўшимча шартнома қилгандик. Мабодо, клуб 10-ўринни олса, шартномани узайтиришга мажбур эди. Ўтган йили олдимизга 10-поғонани эгаллаш вазифаси қўйилган. Билган бўлсангиз, жамоада раҳбарият алмашди. Клубга келган янги раҳбарият мен билан алоқага чиққани йўқ. Улар ўзлари янги жамоа тузишди. Гаплашишни истамаган жойга ўзимиз югуриб бормаймиз. Оддий қилиб айтганда, бизни рози қилмасдан туриб янгиларни “заявка” қилиш мумкин эмас. Билмадим, бу масалани қандай ҳал қилишаркин? Ҳали ҳеч ким билан гаплашганим йўқ. Ҳозирча вазият шунақа. “Сурхон”га Испаниядан мураббийлар ва техник директор келди, дейишди. Кейин улар қайтиб кетишибди ва ўрнига бошқалари келибди. Эшитишимча, жамоага ўтган йилги футболчилардан бир қанчаси қайтибди. Жамоа ўзини кўрсатишга ҳаракат қилади.

“Нима бўлса ҳам “Сурхон”га яхшилик тилайман”

- Боя айтганимдек, ҳали клубдагиларнинг бирортаси билан гаплашганим йўқ. Келган мураббий нима ишлар қилаётганидан умуман тасаввурга ҳам эга эмасман. Икки-учта назорат ўйинлари ўтказди. Нима бўлишини чемпионат кўрсатади. Клубда ким ишлаган тақдирда ҳам “Сурхон”га яхшилик тилайман. Бу жамоанинг мухлислари бор. Яхши ўйин кўрсатса, биз учун ҳам яхши. Лекин келиб-кетиш – бу ҳар бир мураббийнинг бошида бор. Шунча йил футбол ичида ишлаётган бўлсам ҳали умуман бирор жойдан кетишга қўрқмаганман. Менга фарқи йўқ. Фақат барчаси чиройли якун топса, дегандим. Масалан, бизни чақириб, мана бу ўтган йили ишлаб топган ҳақларинг, ўрнингизга бошқалар ишлайди, деса умуман муаммо йўқ, гап-сўз бўлиши мумкин эмас. Ўзимдан-ўзим алоқага чиқиб, биз нима қиламиз, деб гаплашмайман. Бу ёғи нима бўларкин, ҳайронман. Мен ҳеч нима қилганим йўқ, уйда ўтирибман.

“Тўғриси, бир-иккита жамоалардан таклифлар бўлганди”

- Тўғрисини айтсам, менга бир-иккита клублардан таклифлар бўлди. Аммо уларга рад жавобини беришимга тўғри келди. Сабаби, ўзим аввало бу ёқдаги ишимни ҳал қилиб олишим керак. Чунки молиявий масалаларни ҳал қилиб олиш лозим. Агар ўзим хоҳишим билан ишдан кетадиган бўлсам, иш ҳақлари берилмайди. Воқеалар ривожи қандай давом этишини кутяпмиз. Рости, менга қайси клублардан таклифлар бўлганини айта олмайман. Негаки, уларда мураббийлар ишлаяпти. Мураббийни иши шуда, бир кун чақиришади, бир кун уйда ўтирасиз. Бу муаммо эмас ва фожеа ясалмайди. Фақат меҳнат қилиб, ҳаммаси жойига тушганидан кейин мана бундай муносабат бўлиши одамни хафа қилади.

“Футболимиз бу йил ниҳоятда зўр бўлади”

- Охирги 7-8 йилни оладиган бўлсак, бу сафаргиси жуда қизиқ бўлади, буни кўнглим сезяпти. Ҳамма жамоани қарасак, аниқ мақсад учун курашмайди, дея олмаймиз. 8-9 та жамоа совринли ўринлар учун курашса керак. Мавсум давомида уларни омади қандай келаркин, Худо билади. Хурсанд қилаётгани шуки, барча клублар ўз олдига катта мақсадларни қўйяпти. АГМК, “Сўғдиёна”, “Насаф” ва “Бунёдкор” ўтган йилгидек бу йил ҳам “Пахтакор”га рақобат туғдиради. Уларнинг орасига “Навбаҳор” билан “Нефтчи” қўшиляпти. Бундан ташқари, “Қизилқум” ҳам бор. Про лигада ҳам бир қатор клублар жиддий курашади. Футболимиз бу йил ниҳоятда зўр бўлади.