Ғолиб аниқланмаган Қосимов ва Хомяков тўқнашуви ҳақида

3 март куни соат 3 (15:00)да Олмалиқда ОКМК ҳамда “Андижон” клублари Суперлиганинг янги мавсуми 1-тур беллашуви доирасида майдонга тушишди. Учрашувдан олдин Олмалиқда қор ёғди. Бир кун олдин ҳам майдон қор эди, аммо стадион ишчилари жамоаларнинг ўйинолди расмий машғулоти учун тозалашганди. Кечаси билан қор ёғиб чиққанлиги боис ўйин куни ҳам майдон яна оппоқ қор билан бурканганди. Шундай бўлса-да, стадионда яна катта бригадаги ишчи-ходимлар майдонни қордан тозаладилар.

Қор ҳам ўйин бошланиши арафасида тўхтади. Футболчилар табиий ва сифатли майдонда тўп сурдилар. Ўйин тенг курашлар остида кечди. “Андижон”нинг асосий таркибида уч нафар янги футболчи дебютини ўтказди. Дастлабки вазифа дарвоза дахлсизлигини сақлаш эди ва буни футболчилар ишончли тарзда бажардилар. Гарчи ҳаво совуқ бўлишига қарамай, Андижондан ашаддий мухлислар Олмалиққа келиб, стадионда "Андижон"ни қизғин қўллаб-қувватлаб турдилар. Бу ҳам футболчиларга қўшимча куч бағишлагани табиий. Биринчи бўлимда “Андижон” сардори сифатида майдонга тушган ҳимоячи Владимир Бубаньяда гол уриш учун жуда қулай имконият юзага келганди. У бурчакдан узатилган тўпни боши билан дарвозага йўллади. Жавоҳир Илёсов Бубаньянинг зарбасини қўли билан аранг майдон ташқарисига чиқариб юборди.

Шунингдек, “Андижон” посбони бир вазиятда Рухадзенинг боши билан йўллаган зарбасини қайтариб, у ҳам жамоасини голдан сақлаб қолди. Иккинчи бўлимда ҳам хафли ҳужумлар бўлди. Айниқса, энг голга яқини “Андижон” футболчиси Бектемир Абдуманноновда бўлди. ОКМК жарима майдони ичида жамоа сардори Сардор Раҳмоновдан тўпни олиб қўйган Бектемир ҳатто дарвозабонни ҳам алдаб ўтиб, дарвозага зарба бердию, бироқ тўп тўсинга тегиб қайтди. Мезбонлар ҳам гол уриш учун ҳаракат қилди. Бироқ “Андижон” дарвозабони ва ҳимоячилари юқорида таъкидлаб ўтганимиздек, ишончли ўйин кўрсатдилар.

Ўйин эса 0:0 ҳисобидаги нурсиз дуранг билан якун топди. Энди “Андижон” кейинги турни 10 март куни ўз майдонида Тошкентнинг “Бунёдкор” клубига қарши ўтказади. Барча мухлисларни “Бобур Арена”га чорлаймиз. Беллашув соат 15:00 да бошланади.

ОКМК – “Андижон” – 0:0.

3 март. Олмалиқ. “ОКМК спорт мажмуаси” стадиони. 890 томошабин.

Ҳакамлар: Ғайрат Жўраев, Расулжон Фозилов, Максим Нехочин.

VAR: Рустам Лутфуллин

AVAR: Розиябону Юсупова.

Захира ҳаками: Умиджон Раҳимжонов

Назоратчи: Константин Смирнов

Комиссар: Шерзод Ражабов.

ОКМК: Жавоҳир Илёсов, Акром Комилов (Муқим Тошматов, 88), Сардор Раҳмонов, Миржамол Қосимов (Гиорги Папава, 75), Авазбек Ўлмасалиев, Дилшод Аҳмадалиев, Ойбек Рустамов, Арихиро Сентоку (Мурод Эрматов, 90+1), Иракли Рухадзе (Нодир Абдураззоқов, 75), Милан Скрбич (Азиз Холмуродов, 46), Хуршид Ғиёсов.

“Андижон”: Игорь Литовка, Абдувоҳид Ғуломов, Владимир Бубанья, Ислом Маматказин, Муҳаммадкарим Тоиров (Леван Арвеладзе, 88), Сардор Азимов, Фарҳод Бекмуратов, Шерзод Эсанов (Илҳом Абдуғаниев, 46), Фарҳод Соҳибжонов (Армин Бошняк, 76), Бектемир Абдуманнонов (Демир Имери, 62), Лука Згурский.

Огоҳлантиришлар: Ойбек  Рустамов, 41. Иракли Рухадзе, 48 – Владимир Бубанья, 27. Муҳаммадкарим Тоиров, 83.