Грандлар талашаётган суперталант “Реал”ни танлади

Англия Премьер-лигасида “Борнмут”даги ўйинлари билан кўзга ташланган Испания терма жамоаси марказий ҳимоячиси Дин Хёйсен қатор гранд клублари орзусига айланди.

Англиянинг етакчи клублари ўйинчини олиш мақсадида унинг отасига алоқага чиқяпти. Бироқ Хёйсеннинг ўзи муҳитни ўзгартириш мақсадида “Туманни Альбион”ни тарк этишга мойиллик билдирган.

Marca нашрининг ёзишича, Дин Хёйсен ўз юртига қайтиб, “Реал” сафига қўшилишни режалаштирмоқда. Ўз навбатида, “Қироллик клуби” ҳам 20 ёшли иқтидор эгасини ёзги трансферлар рўйхатининг биринчи қаторига ёзиб қўйган.

Хёйсеннинг шартномасида уни 58 миллион еврога трансфер қилиш мумкинлиги ва бу тўловни учга бўлиб амалга ошириш имконияти борлиги белгилаб қўйилгани ҳам даъвогар клубларга жуда манзур бўлмоқда.