Грилишни урган мухлис ҳибсга олинди

Англия Премьер-лигасининг 31-тури доирасидаги “Манчестер Юнайтед” ва “Манчестер Сити” ўртасидаги ўйиндан сўнг “Сити” футболчиси Жек Грилишга юзига урган “Юнайтед” мухлиси қўлга олинди ва судга тортилади. Бу ҳақда The Telegraph нашри хабар берди. Учрашув “Олд Траффорд” стадионида бўлиб ўтган ва 0:0 ҳисобида якунланган эди.

Манбанинг ёзишича, 20 ёшли йигитга ҳужум қилиш айби қўйилган ва у июль ойида Манчестер судида жавоб беради. Ҳозирча “Сити” ҳам, “Юнайтед” ҳам изоҳ беришдан бош тортган, чунки тергов ишлари давом этмоқда. Шунингдек, “қизил иблислар” вакиллари полиция билан яқиндан ҳамкорлик қилаётгани маълум қилинди.

Эслатиб ўтамиз, дербидан кейин Жек Грилиш майдонни тарк этаётган вақтда, “Юнайтед” мухлислардан бири уни чақириб, тортишув чоғида туннел яқинида футболчининг юзига тарсаки туширган.