Гвардиола: “Бундан ҳам яхшироқ ўйнашимиз мумкин эди“

“Манчестер Сити“ бош мураббийи Хосеп Гвардиола “Спортинг“га қарши йирик ғалабадан сўнг ўз фикрларини билдириб ўтди. Унга кўра, жамоа янада яхшироқ ўйин кўрсатиши мумкин эди.

“Баъзи футболчилар одатдагидан ёмонроқ ўйин кўрсатишди. Биз айрим вазиятларда тўпни осонликча рақибга топширдик. 

Дастлабки 7 дақиқа “Спортинг“нинг қанчалик яхши жамоа эканини кўрсатиб берди. Ишонинг, биз ва улар ўртасидаги фарқ 5:0 даражасида эмас.

Футболда бир қоида бор: тўп сизда бўлганида, уни йўқотмаслик лозим, айниқса, оддий вазиятларда. Агар бу хатолар Европанинг топ клубларига қарши ўйинда содир бўлганида, улар тезлик билан қарши ҳужумга ўтиб кетарди.

Шунга қарамай, мен хурсандман. Сабаби, кейинги босқич учун катта қадам ташладик. Бироқ бундан ҳам яхшироқ ҳаракат қилишимиз мумкин эди“, - деди испаниялик мутахассис.