Гвардиола "Ливерпуль"га қарши учрашувдан кейинги матбуот анжуманида Абдуқодир Ҳусановни ҳам тилга олди

"Манчестер Сити" бош мураббийи Хосеп Гвардиола "Ливерпуль"га қарши йирик ғалабадан сўнг матбуот анжуманида иштирок этиб, ўйин ҳақида ўз фикрлари билан ўртоқлашди ва ҳамюртимиз Абдуқодир Ҳусановни ҳам тилга олди.

Гвардиола ушбу ғалабани ўзининг 1000-ўйинига берилган "ажойиб совға" деб атади ва жамоаси лигадаги энг кучли рақиблар билан беллаша олишини таъкидлади.

Шу билан бирга, у футболчиларни ҳали ҳам яхшиланишга чақирди. Унинг фикрича, жамоа чемпионлик учун кураша олиши учун мавсум давомида ўсиши зарур.

"Биз "Астон Вилла" ёки мавсум бошида ютқазган пайтларда ҳам мен жамоада яхши муҳит борлигини айтгандим. Сабаби нимада дейсизми? Бугун захирада кимлар борлигини кўринг — ҳатто Абдуқодир Ҳусанов ҳам таркибга кирмади.

Ўтган мавсумда бизда бу имконият йўқ эди. Тўрт марта қаторасига Премьер-лигада чемпион бўлиш бизга жуда қаттиқ таъсир қилди. Энергия етишмади, жамоа аввалгидек эмасди, буни қабул қилиш мумкин.

Шундай бўлса-да, биз ҳеч қачон таслим бўлмадик. Охирги 15–20 ўйинда тўқнашувда энг яхши жамоа бўлдик.

Клублар ўртасидаги Жаҳон чемпионатидан кейин жамоа яна ўзгарди. Ҳамма биргаликда ҳаракат қилмоқда, шу жумладан мен ҳам. Шу сабабли, биз янада яхшироқ бўлишни хоҳлаяпмиз", — дея таъриф бериб ўтди испаниялик мутахассис.

Унинг таъкидлашича, чемпионлик октябрь ёки ноябрда эмас, балки бутун мавсум давомида ўсиб борган жамоалар томонидан ютилади:

"Октябрь ёки ноябрда чемпион бўлмайсиз. Чемпион бўлиш учун ҳар ой ўсишингиз керак. Сентябрда ёки октябрда биринчи ўринда бўлишингиз мумкин, лекин ўз ўйинингизни доим такомиллаштирмасангиз, буни сақлаб қололмайсиз".

Гвардиола сўнгги ўйинларда жамоанинг айрим паллалардаги ўйинидан қониқмаганини ҳам яширмади:

"Менга "Борнмут" ва "Ливерпуль"га қарши иккинчи бўлимлар ёқмади, шунингдек "Дортмунд"га қарши ўйиннинг охирги ярим соати ҳам. Бу биринчи бўлимдаги ўйиндан фарқ қиларди. Бу — бизнинг ўсишимиз керак бўлган жиҳат.

Шу билан бирга, бу ҳафта биз учун жуда муҳим бўлди. "Борнмут" лигада иккинчи ўринда эди, "Дортмунд" ЕЧЛда хавфли жамоа, "Ливерпуль"га қарши эса бу ҳақиқий синов бўлди. Биз ажойиб ҳафтани ўтказдик", - деди "шаҳарликлар" устози.

Маълумот ўрнида, "Сити" бугун "Этиҳад"да "Ливерпуль"ни 3:0 ҳисобида мағлуб этди ва турнир жадвалида "Арсенал" билан фарқни тўрт очкогача қисқартирди. Бу сўнгги саккиз кундаги учинчи йирик ғалаба бўлди — илгари "Борнмут" ва "Боруссия Дортмунд" ҳам енгилган, жами 10 та гол урилган ва атиги иккита гол ўтказилган.