Гвардиол «Манчестер Сити» билан музокараларни тўхтатди

«Манчестер Сити» ҳимоячиси Йошко Гвардиол шартномасини узайтириш бўйича музокараларни вақтинча тўхтатди. Испаниянинг AS нашри ёзишича, бу қарор «Реал» клуби қизиқиши фонида қабул қилинган.

Манба маълумотларига кўра, Мадрид жамоасининг бош мураббийи Жозе Моуриньо 24 ёшли хорват футболчисини ҳимоя чизиғини кучайтириш учун асосий номзодлардан бири сифатида кўрмоқда. Португалиялик мутахассисни Гвардиолнинг универсаллиги, яъни ҳам марказий ҳимоячи, ҳам чап қанотда бирдек ишончли ўйнай олиши ўзига жалб қилмоқда.

«Манчестер Сити» раҳбарияти Гвардиолга янги шартнома таклиф этган, гарчи амалдаги битим 2028 йил ёзигача мўлжалланган бўлса-да. Клуб ҳимоячини жуда юқори баҳолайди ва уни жамоанинг муҳим бўғини сифатида кўради.

Шунга қарамай, футболчининг ўзи ҳозирча охирги қарорни шошилмай туриб қабул қилмоқда. Гвардиол «Реал»нинг қизиқиши ва Жозе Моуриньонинг шахсан уни жамоага олиб келиш истагидан хабардор экани учун ўйлаб кўришга вақт сўраган.

Нашр таъкидлашича, трансферни амалга ошириш осон бўлмайди — «Манчестер Сити» етакчи футболчилари билан осонликча хайрлашмайди. Бироқ Хосеп Гвардиола кетгани ва Энцо Марески келганидан кейин клубдаги ўзгаришлар вазиятга таъсир кўрсатиши мумкин.

Йошко Гвардиол 2023 йилдан буён «Манчестер Сити» шарафини ҳимоя қилмоқда. У «РБ Лейпциг» клубидан 90 миллион евро эвазига харид қилинган эди.