Гвардиола шогирдидан танбеҳ эшитди

“Манчестер Сити” ярим ҳимоячиси Жек Грилиш Англия кубоги ярим финалида “Ливерпуль”дан учралган мағлубият (2:3) ҳақида фикр билдирди.

26 ёшли вингер жорий мавсумда “шаҳарликлар” АПЛ ва Чемпионлар лигасида ғалаба қозона олишига умид билдирди ва шу билан бирга жамоа бош мураббийи Хосеп Гвардиолани ҳам танқид қилди.

“Премьер-лигада иқтидорли ва тажрибали футболчилари кўп бўлган яна бир жамоа бўлиши даргумон. Биз фақат ўзимизни қўлга олишимиз ва олдинга интилишимиз керак.

Биринчи бўлим биз хоҳлагандек ўтмади. Танаффусдан сўнг Гвардиола бир нечта алмаштиришларни амалга оширди, менимча, бу жуда кеч эди”, - деди Грилиш Goal нашрига берган интервьюсида.

Шунингдек, англиялик футболчи бу мағлубият учун узр сўрашни истамади ва муваффақияцизликка асосий сабаб сифатида жамоанинг ўйинга жуда кеч қўшилганини кўрсатди.

Эслатиб ўтамиз, бугун, 17 апрель куни Англия кубоги 1/2 финалининг иккинчи ўйини бўлиб ўтади ва унда "Челси" ва "Кристал Пэлас" клублари тўқнаш келишади. Ўйин Тошкент вақти билан 18:30да бошланади. Финал 14 майга белгиланган.