Гвардиола хатосидан афсус қилмайди

“Манчестер Сити” бош мураббийи Хосеп Гвардиола ўз вақтида Жейдон Санчонинг сотиб юборилишига рухсат бергани хато бўлганини тан олмади.

Санчо 2017 йилдан “Боруссия”га кўчиб ўтганидан кейин, 20 ёшида дортмундликлар сафида Бундеслигада 102 та учрашувда 37 та гол урди ва 52 та голли пас оширди. Айни пайтда англиялик ярим ҳимоячи харидори кўп бўлган ўйинчилардан ҳисобланади.

Хусусан, Санчога “Челси”, “Манчестер Юнайтед”, “Ливерпуль”, ҳатто “Сити”нинг ўзи ҳам харидор бўлмоқда.

- Мен аввал ҳам бир неча бор айтганимдек, Санчонинг кетганидан афсусда эмасман. Қарорни у қабул қилган. Унинг ишлари юришиб кетди, табриклашдан бошқа чора йўқ.

У Англия терма жамоаси ўйинчиси ҳисобланади ва катта истеъдод соҳиби сифатида Дортмундда зўр ўйнаяпти. Биз унинг клубда қолишини истаганмиз, у эса кетишни маъқул кўрган. Кимдир кетишни истаса, биз уни қўйиб юборишга мажбурмиз, - деди Хосеп Гвардиола.