Ҳабиб Нурмагомедов фаолиятини якунлайдими? Унинг менежери жавоб берди

UFCнинг енгил вазндаги чемпиони Ҳабиб Нурмагомедовнинг менежери Али Абдул Азиз мижози ҳали фаолиятини якунламоқчи эмаслигини айтди. Бундай хабарлар спортчининг отаси Абдулманап Нурмагомедов вафотидан сўнг пайдо бўлганди. Шунингдек, менежер америкалик Жастин Гэтжи билан жанг аниқ бўлиши ҳақида ҳам айтиб ўтди.

“Ҳабиб фаолиятини якунламоқчи эмас! Унинг яна ўз олдига қўйган мақсадлари бор. Гэтжи билан бўлажак тўқнашувга келсак, жанг санаси борасида ташкилотчилар билан баҳс юритмоқдамиз. Аниқлик киритсак, маълум қиламиз. Енгил вазн тоифасининг икки энг кучли вакили тўқнаш келади. Биз Ҳабибнинг рақиблари қандай кучга эга эканлигини яхши биламиз. Гэтжи Фергюсонни нима аҳволга солганини кўрдик. У Тонини ҳаваскор жангчига ўхшатиб қўйди. Россияда Ҳабибнинг фаолиятини якунлаши борасидаги хабарлар  пайдо бўлмоқдами? Бу мамлакатда кўплаб сохта нарсалар бор. Дональд Трамп айтганидек, сохта янгиликлар”, - деди Абдул Азиз TMZга берган интервьюсида.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)