"Ҳакамлар ҳақида гапирмоқчи эмасман, айбни улардан изламайлик" - Рўзиқул Бердиев иштирокида матбуот анжумани

“Нефтчи” – “Насаф” (2:1) ўртасидаги учрашувидан кейинги матбуот анжуманининг дастлабки қисмида меҳмонлар бош мураббийи Рўзиқул Бердиев иштирок этди.

- Бугун иккита жамоа ҳам бир хил схемада ўйнагани учун фақат тепадага тўплар учун кураш бўлди. “Нефтчи” жамоаси буни яхши ўзлаштирган. Узун паслар орқали яхши ўйнайди ва стандарт вазиятларда ҳам яхши ҳаракатланади. Бугун ҳам худди шундай бўлди. Узун тўплар ва тўп учун курашлар кўп бўлди. Иккита вазиятда, пенальти ва жарима зарбасидан осонгина гол ўтказдик. Бу ерда ўйинчиларни ҳам хатоси бор ва дарвозабон ҳам хато қилди. Шунинг учун мағлубиятга учрадик. “Нефтчи”ни ғалаба билан табриклаймиз.

- Биринчи бўлимда ён ҳакамга эътироз билдирдингиз? Умуман, ўйиндаги ҳакамликдан эътирозингиз борми?

- Ҳакамликни муҳокама қилмоқчи эмасман. Лекин ҳакамлар майдонда энг муҳим инсонлар. Ўйинни қандай бошқариш уларга боғлиқ. Бугунги учрашувда ҳакамлар балки хатолар қилгандир, бироқ муҳокама қилмоқчи эмасман. Ҳакамлар ҳақида кўп гапириб бўлганман. Шунинг учун айбни улардан изламайлик. Баъзи вазиятларда ҳужумда ўзимиз ҳам кутилганидек ҳаракат қилмадик. Бунга бир нечта сабаблари бор. “Нефтчи” узун паслар орқали ўйнайди. Биз бунга кўникмаганмиз. Балки шу нарса бизга озгина қийинчилик туғдиргандир. “Нефтчи” бошқа учрашувларда ҳам шунақа ўйнайди. Ҳужумчига тўпни оширади, курашади. Бу нарсага тўғриси, камроқ тайёргарлик кўргандик. Лекин билардикки, гол урилган вазиятларда эҳтиёткорлик бўлиши керак эди. Ўша ҳолатларда озгина эътиборни йўқотдик.

- Акмал Мозговой нима учун ўйин қайдномасига киритилмади. Буни сабаби нимада? Унинг ўрни майдонда сезилгандек туюлди.

- Албатта, у асосий футболчимиз. Бугун эрталаб ўйинда ёрдам бера олмаслигини билдиргани учун уни умуман қайдномага киритмадик. Акмалнинг ўрни билинди. У бугунги учрашувда бизнинг асосий режамизда эди.

- Иккинчи таймда жамоа марказда ютқазиб қўйгандек туюлди. Бу йўқотишлар билан боғлиқми?

- Ўйлайманки, Мозговойнинг ўрнида Умар яхши ҳаракат қилди. Марказда эмас, стандарт вазиятларда рақибга имконият бердик. Ўртада муаммолар, бўш жойлар бўлмади. Кўрдинглар, бурчакдан тўп узатилгач, тўп қўлга тегди дейишди, пенальти қўйилди, кейин фол ишлатилди. Булар қимматга тушди.

- Бугун “Насаф” мағлубиятга лойиқмиди?

- Менимча, бугун дуранг адолатлироқ бўларди. Чунки икки жамоа ҳам бир хил тактикада ўйнади. Кам вазиятлар бўлишини билардик. Шу боис стандарт вазиятларга кўпроқ эътибор қаратилиши керак эди. Улар бундан яхшироқ фойдаланди. Умумий қилиб олсак, менимча, тенг курашлар остида кечди. Иккала жамоа ҳам бир хил имкониятларга эга бўлди.

- Лима Круз ҳужумда ёлғизланиб қолаётгандек. Иккинчи даврада ҳужумда ўзгаришларни кўришимиз мумкинми?

- Асосий муаммоимиз ҳужум чизиғи. Ўзларинг ҳам яхши биласизлар. Яхши ҳужумчи олиш учун ҳаракат қиляпмиз. Агар маъқул келадигани бўлса, албатта амалга оширамиз. Лекин биз барибир олдинги чизиққа бир-иккита футболчи олишимиз керак бўлади. Бу бизга жуда зарур.