Ҳаким Фузайлов: "Ҳаммаси тушунарли. Бу Улуғбек Бақоевнинг қарори"

“Бухоро” клубидаги вазиятдан хабарингиз бўлса керак. Бу клубни жорий чемпионатда мухлисларини хурсанд қилиши анча қийин кечяпти. Бир қатор ўзгаришларга қўл уриляпти, аммо ҳали ижобий натижа кўзга ташланмаяпти. Биласиз, “Бухоро” бош мураббийи сифатида аввалига Ҳаким Фузайлов ишлаётганди. 4-турдан кейин унинг ўрнига Улуғбек Бақоев ушбу лавозимга тайинланди.

Ҳаким Қаюмович ўтган йили “Бухоро” устози сифатида клубни про лигадан Суперлигага олиб чиқа олгани ёдингизда бўлса керак. Гарчи Фузайлов бош мураббийликни топширганига қарамай, ҳали клубдан кетгани йўқ. Маслаҳатчи мураббий сифатида ишлаб келяпти. Фузайлов Sports.uz мухбири билан мулоқот чоғида аввало “Бухоро”нинг бу йилдаги салбий натижалари ҳақида тўхталди.

“Юзага келган вазият ва натижаларни ёқимли эмас, деб айтиш мумкин. Аммо нима ҳам қила олардим?! Соғлигим тақозосига биноан ишдан кетишимга тўғри келди. Шу боис қандайдир хулоса чиқариш керак эмас. Бу жамоани мен шакллантирдим. Лекин ҳозирда клубни Улуғбек Бақоев бошқармоқда. Нима қилиш керак? Шунчаки, таркибни кучайтириш ва иккинчи даврага тайёргарлик кўриш зарур холос. Шунда нимадир ҳақида гапириш мумкин бўлади”.

Бақоев таркибни тозалашни бошлаб юборган. Аллақачон жамоани бир қатор футболчилар тарк этган. Биринчи даврадан сўнг янги ўйинчилар олиб келинади. Фузайлов билан бирга ишлаган айрим ўйинчиларга жавоб берилганига Ҳаким Фузайлов шундай муносабат билдирди:

“Ҳаммаси тушунарли. Бу Улуғбек Бақоевнинг қарори. Ўйлайманки, бу хусусида фикр билдиришга эрта. Ҳар бир мураббийнинг футболга бўлган муносабати турлича. Шунинг учун бироз сабр қилиш керак. Аввал жамоа таркибини кучайтирсин, тайёргарлик қандай самара беришини иккинчи даврадаги ўйинлар кўрсатиб беради”.

Ҳаким Қаюмович иккинчи даврада ҳам “Бухоро”даги ишини давом эттирадими ёки кетадими?

“Энг асосийси, саломатлик. Бугунги кунга келиб соғлигим анча яхши томонга ўзгарди. Қон босимим жойига тушди. Яшайверайликчи, кўрамиз”, - дейди Фузайлов.

Иккинчи даврада жамоага қандай футболчилар келади? Бу масалада бўйича Қаюмовичдан сўраганимизда жавоби қуйидагича бўлди:

“Таркибни кучайтириш албатта бўлади. Табиийки, бу билан жамоа бош мураббийи Улуғбек Бақоев ва унинг штаби шуғулланади. Шунинг учун келинг, бироз кутайлик. Трансфер ойнаси очилиши арафасида кўрамиз”.

Шуҳратбек Жўраев.