Ҳаким Фузайлов: "Жамоамиз чемпионатга деярли тайёр"

Тошкентда шуғулланаётган “Бухоро” клуби кеча “Бунёдкор” академияси майдонида “Нефтчи”га қарши назорат учрашувини ўтказиб 1:0 ҳисобида ғалаба қозонди. Ўйиндан сўнг Ҳаким Қаюмовични суҳбатга тортдик.

- Ҳаким Қаюмович, “Нефтчи” билан учрашувда “Бухоро” яхши таассурот қолдирди. Бу ҳақида нима дея оласиз?

- Ҳозир тайёргарлигимиз авжида кетяпти. Режа бўйича шуғулланяпмиз. Суперлигага чиқиш учун ҳали умидимизни узмадик. Кўриб турганингиздек, таркибда ўзгаришлар бор. Ҳозир айтганимдек, тайёргарлигимизни яхши даражада олиб боряпмиз. Асосий вазифамиз чемпионатга қадар оптимал ҳолатда етиб келиш. Чунки икки ҳафта вақтимиз қолди. Шу вақт давомида биз янада яхшироқ тайёргарлик кўришимиз лозим. Йигитлар машғулотларда бор кучини бериб ҳаракат қиляпти. Ҳозирда коллектив жуда яхши.

- Таркибда янги футболчиларни кўряпмиз. Айниқса, Ҳумоюнмирзо Иминов ажралиб турибди. Умуман айтганда, таклиф қилинган футболчилар клубда қолишдими?

- Бугун майдонга тушган янги ўйинчиларимиз билан шартномалар тузганмиз. Қолганлари ҳозирча кўрикда бўлиб турибди. Яна охиригача текширамиз. Қолади ёки қолмайди, деб айта олайман. Ўйлаб кўриб, бир хулосага келамиз. Янги футболчилар билан 60-65 фоизга шартнома имзолаганмиз.

- “Бухоро”нинг ўйинида жиддий бурилиш бор. Сизнингча, мавсумнинг қолган қисмида жамоа ўйини неча фоизга ўзгаради?

- Суперлигага чиқишимиз учун ҳужум чизиғида ўзгаришлар қилишимиз керак. Айниқса, ҳужумкор футбол кўрсатишимиз лозим. Ҳимояда эса шубҳасиз мустаҳкам туришимиз шарт. Кейингина вазифани бажаришимиз мумкин. Ҳозир шунинг устида иш олиб боряпмиз. Бугунги ўйиндан ҳам шуни билиш мумкинки, жамоамиз чемпионатга деярли тайёр.

- Асосий рақобатчилар – “Турон”, “Андижон” ва “Машъал”ни ҳам кузатиб турибсизми?

- Тўғри, “Турон”, “Андижон” ва “Машъал” жамоалари билан ўртамизда очколар бўйича фарқимиз бор. Лекин унутмаслик керакки, асосий ўйинлар ҳали олдинда. Рақобатчиларимизга етиб олиб, олдимизга қўйилган вазифани бажаришга астойдил ҳаракат қиламиз.

Фузайлов "Бухоро"нинг ўйинини кучайтириш учун "Янги Месси"ни топиб олди ва легионерлардан воз кечди!